Се забрзува изградбата на капацитети за складирање струја во Грција

Грција го забрзува развојот на капацитетите за складирање електрична енергија, откако заврши евалуацијата на повеќе од 800 инвестициски барања за приклучување на самостојни постројки. Проекти со вкупна моќност до 4.700 мегавати ќе преминат во следната фаза, соопшти грчкото Министерство за животна средина и енергетика, јави дописничката на МИА од Атина.

— реклама —

До надлежните институции биле поднесени 831 барање со вкупна моќност од 12.319 мегавати. Од нив, 221 барање, со моќност од 10.521 мегавати, се однесувале на приклучување кон преносниот систем, додека останатите 610, со моќност од 1.798 мегавати, биле наменети за приклучување кон дистрибутивната мрежа.

По спроведената евалуација, согласно утврдените критериуми, биле изготвени ранг-листи на проектите, кои веќе се објавени во Службен весник на Грција.

— реклама —

На листите за приклучување кон преносниот систем се опфатени постројки со вкупна моќност од 6.366,88 мегавати, додека проектите за дистрибутивната мрежа имаат вкупна моќност од 1.403,88 мегавати. Вкупно се рангирани проекти со моќност од 7.770,76 мегавати, од кои ќе бидат доделени услови за приклучување за капацитет до 4.700 мегавати.

— реклама —

Од грчкото Министерство посочуваат дека големиот интерес на инвеститорите ја потврдува важноста на складирањето енергија за подобро искористување на обновливите извори, намалување на ограничувањата во производството и создавање пофлексибилен и посигурен електроенергетски систем.

Министерот за животна средина и енергетика, Ставрос Папаставру, истакна дека Грција во изминатите години направила значителен напредок во енергетската транзиција, вложувајќи во инфраструктура и проекти за производство на електрична енергија од обновливи извори.

— реклама —

Како следна цел, тој го посочи складирањето на произведената енергија за нејзино максимално искористување, со придобивки за граѓаните и бизнисите. Папаставру нагласи дека затоа се забрзува развојот на капацитетите за складирање, со проекти до 4.700 мегавати што преминуваат во следната фаза.