Во текот на изминатото деноноќие полицијата регистрирала вкупно девет пријави за семејно насилство на повеќе локации низ државата, при што седум лица биле лишени од слобода, информираат од Министерството за внатрешни работи.
Во Гевгелија бил приведен 51-годишниот Б.С., откако физички ја нападнал својата сопруга во викенд-куќа во гевгелиско село, при што ѝ нанел повреди на главата и телото.
Во Скопје, 37-годишна жена пријавила дека нејзиниот сопруг ѝ упатувал закани нејзе и на нејзиното семејство во домот на нејзините родители на подрачјето на Бит Пазар.
Полицијата привела и 73-годишен скопјанец, кој, според пријавата, физички ја нападнал својата 35-годишна ќерка, употребувајќи тврд предмет.
Во друг случај, 45-годишен жител на Карпош пријавил дека бил физички нападнат од неговата сопруга, која кон него фрлала тврди предмети.
Поради физички напад врз својата 69-годишна мајка, на подрачјето на Центар била приведена и 37-годишна жена од Скопје.
Во Ѓорче Петров бил лишен од слобода 44-годишен скопјанец, откако неговата сопруга пријавила дека за време на семејна веселба во угостителски објект ѝ упатувал закани.
Во тетовско село бил приведен 30-годишен маж кој, според пријавата, му се заканувал на свој 61-годишен роднина.
Меѓу приведените е и 28-годишен тетовец, кој, според пријавата на неговата мајка, агресивно се однесувал, кршел покуќнина, а потоа со нож ѝ се заканувал на сопругата и физички ја нападнал својата мајка.
Во Куманово, пак, бил приведен 34-годишен маж кој отишол во домот на својата поранешна сопруга и ѝ се заканувал со физички напад.
Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
