„Седум починати од западнонилска треска - осум недели молк за водата во Гостивар, одговорни нема“, вели СДСМ

СДСМ преку соопштение обвини дека институциите не даваат одговори за низа здравствени проблеми, посочувајќи ги труењето со вода во Гостивар и смртните случаи од западнонилска треска како примери за, како што велат, задоцнета реакција и недостиг на одговорност.

Од партијата велат дека поминале осум недели од случајот со водата во Гостивар, по кој, според нив, околу 5.000 граѓани завршиле во болница, но сè уште нема објавен извештај за безбедноста на водата ниту одговор кој е одговорен за состојбата.

— реклама —

СДСМ посочува дека во околу 50 населени места низ земјава биле регистрирани проблеми поврзани со безбедноста на водата, како и дека проблеми имало со четири реки и локални извори кои ги користат граѓаните.

— реклама —

„Одговори нема, одговорност нема“, велат од СДСМ.

Во партиското соопштение се поврзуваат и актуелните случаи на западнонилска треска со, како што тврдат од СДСМ, институционални пропусти. Од партијата посочуваат дека досега седум лица починале од болеста.

— реклама —

Според СДСМ, власта задоцнила со реакцијата, мерките и прскањето против комарци, поради што бараат одговорност од надлежните институции и функционерите.

— реклама —

„За секој скандал – молк. За секое прашање – криење. За одговорност – никој надлежен“, наведуваат од СДСМ.

Од партијата порачаа дека премиерот Христијан Мицкоски и функционерите во Владата должат одговори за состојбите, а институциите треба да преземат соодветни мерки.