Министерството за внатрешни работи информира дека во последното деноноќие биле регистрирани седум случаи на семејно насилство низ државата, при што едно лице е лишено од слобода, а со две лица е извршен службен разговор.
Во Скопје, 57-годишна жена пријавила дека била физички нападната од нејзиниот сопруг во објект на подрачјето на Кисела Вода.
Полициски службеници од СВР Скопје извршиле службен разговор со М.П. (19) и С.П. (42), постапувајќи по пријава дека на подрачјето на Бутел физички нападнале и упатувале закани кон 19-годишната сопруга на М.П. и снаа на С.П.
Во друг случај во Скопје, 42-годишна жена пријавила дека на подрачјето на Центар била физички нападната од нејзиниот сопруг В.Т. (50), со кого не живее заедно.
Во скопското село Ласкарци, 50-годишен маж пријавил дека по расправија со неговиот брат Б.С. и неговиот син, братот ја турнал сопругата на пријавителот, која во рацете го држела седуммесечниот внук. При инцидентот детето паднало, а полицијата презема мерки за расчистување на случајот.
Во струмичко село, 32-годишна жена пријавила дека нејзиниот невенчан сопруг физички ја нападнал, при што употребил и тврд предмет.
Во Штип, 47-годишна жена пријавила дека била физички нападната од нејзиниот брат во дворот од нејзиниот дом.
Најсериозниот случај бил регистриран во кумановско село, каде полициски службеници го лишиле од слобода С.В. (72), откако било пријавено дека се однесувал агресивно и упатувал закани кон неговата 66-годишна поранешна сопруга.
Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
