Седум Срби уапсени во Шпанија: Во вила пронајдена просторија за мачење и арсенал оружје

Шпанската полиција уапси седум српски државјани во Естепона под сомнение дека во вила киднапирале и мачеле најмалку двајца мажи. При претресот на објектот била пронајдена просторија опремена за мачење, огнено оружје и траги кои би можеле да помогнат во понатамошната истрага.

Полицајците во вилата затекнале двајца мажи без облека, со видливи повреди и врзани во просторијата. Ѕидовите и подот биле обложени со пластика, а во просторијата биле пронајдени столица, чекан, пиштол и пластични врзувалки.

При претресот полицијата запленила две автоматски пушки АК-47, уште еден пиштол и три шаржери со муниција. Оружјето е испратено на балистичко вештачење за да се утврди дали било користено во други кривични дела, вклучително и во случаи во областа на Марбеља.

— реклама —

Уапсени се Филип Ј. (25), Марко Н. (31), Зоран Н. (35), Иван М. (24), Секулиќ М. (27), Лео Ј. (29) и Алекс К. (24). Според шпанската полиција, ниту еден од нив немал пријавено живеалиште.

Случајот бил откриен откако партнерката на еден од киднапираните мажи ја известила полицијата. Таа навела дека мажот ѝ кажал дека оди на „сомнителна“ работа и побарал да повика полиција доколку не ѝ се јави во следните десет минути.

Кога полицајците пристигнале пред вилата, забележале дека светлата се запалени и неколкупати ѕвонеле. Откако се отворила автоматската врата, забележале двајца маскирани мажи.

— реклама —

Според документите на шпанските власти, од кујнската врата потоа истрчал маж без облека, со крваво лице, кој им кажал на полицајците дека бил киднапиран и дека ќе биде убиен.

Еден од маскираните мажи се обидел да побегне со огнено оружје, а во текот на полициската акција од вилата излегле уште неколку лица. Еден од нив, според наводите во документите, префрлил торба преку оградата на соседната куќа. Во неа биле пронајдени автоматските пушки.

— реклама —

Во полициската потера биле повредени тројца полицајци.

Инспекторите пронашле и биолошки материјал кој може да помогне во идентификацијата на други лица за кои постои сомнение дека се поврзани со групата.

Според извори блиски до истрагата, групата се сомничи за трговија со кокаин и хашиш, како и за изнуда, а нејзините активности наводно се проширувале во повеќе делови на Шпанија. Дел од уапсените и претходно биле евидентирани од полицијата во случаи поврзани со насилни разбојништва и трговија со дрога.

Инспекторите сомневаат дека двајцата пронајдени мажи, 45-годишниот Мигел Анхел од Кадиз и 31-годишниот Хамза од Сеута, можеби биле поврзани со истата криминална организација. Според извори блиски до истрагата, можно е мачењето да било дел од пресметка во рамките на криминалната група, но овие наводи допрва треба да бидат потврдени.

Една од жртвите подоцна била уапсена заедно со седуммината осомничени српски државјани.

Истрагата продолжува, а шпанските власти преку балистичко вештачење ќе проверуваат дали запленетото оружје било користено и во други кривични дела.