Седуммина исчезнати по напад врз танкер кај Романија, две членки на НАТО разгледуваат вонредни мерки

Потрагата по седум членови на екипажот на танкерот за хемикалии „Вајн трејдер“ продолжува откако бродот се запалил по напад со беспилотни летала во близина на романскиот брег на Црното Море. Танкерот, кој плови под знамето на Сан Марино, во четвртокот наутро пријавил експлозии и пожар на околу 24 километри источно од устието на Дунав, кај Сулина, објави Би-би-си.

Романскиот претседател Никушор Дан потврди дека со дронови биле погодени „Вајн трејдер“ и уште еден танкер во областа, „Јара Џеј“, кој бил нападнат во средата. Во моментот на нападот, „Вајн трејдер“ не превезувал товар.

Москва соопшти дека биле погодени два товарни брода со воена опрема што пловеле кон украинското пристаниште Одеса, но не ги наведе нивните имиња.

— реклама —

Романските власти потврдија дека потрагата по исчезнатите членови на екипажот е во тек. Во акцијата учествуваат два хеликоптера „Блек хок“ и два спасувачки брода. Романското Министерство за внатрешни работи објави снимка на која се гледа еден од хеликоптерите како лебди над оштетениот брод.

Приоритет е да се стигне до четворицата членови на екипажот за кои е потврдено дека се живи. Спасувачките екипи се соочуваат со тешки услови поради разбрануваното море и високите бранови.

Танкерот пловел од Тунис кон Романија, а околу седум часот наутро пријавил неколку експлозии. Според изјави на екипажи од блиски бродови што ги пренеле романските медиуми, танкерот бил погоден од два дрона. Во текот на ноќта, во близина на местото на нападот, недалеку од украинскиот Змиски Остров, бил забележан рој руски беспилотни летала.

— реклама —

Западниот брег на Црното Море во последно време е изложен на зачестени напади со беспилотни летала. Во вторникот, два трговски брода биле погодени јужнее, во близина на бугарскиот брег. Едниот потонал, а по 11 членови на неговиот екипаж сè уште се трага. Бугарија се сомнева дека зад нападот стои Русија и го повикала рускиот амбасадор на разговор.

Поради зачестените инциденти, претседателите на Романија и Бугарија наскоро ќе разговараат дали да побараат активирање на членот 4 од Северноатлантскиот договор. Оваа одредба им овозможува на земјите членки да побараат консултации со сојузниците кога сметаат дека се загрозени нивниот територијален интегритет, политичката независност или безбедноста.

„Сакаме да ги имаме сите информации за тоа што се случило, но романската држава ќе одговори“, изјави Дан.

— реклама —

Тој во Брисел ќе се сретне со генералниот секретар на НАТО, Марк Руте, и со бугарскиот премиер Румен Радев за да разговараат за растечките безбедносни закани во регионот на Црното Море. Меѓу темите ќе бидат и оперативните потреби, вклучително и дополнителната опрема за заштита на поморскиот сообраќај.

Украина директно ја обвини Русија за претходните напади врз цивилни бродови во западниот дел на Црното Море, важна рута за украинскиот извоз и увоз. Претседателката на Европската комисија, Урсула фон дер Лајен, во вторникот изјави дека Црното Море станува „уште еден фронт на ескалација на руската војна во Украина“ и оцени дека тоа е неприфатливо.

На танкерот „Јара Џеј“, кој плови под знамето на Коморските Острови, пожар избувнал доцна во средата по напад со дрон. Според достапните информации, екипажот е безбеден и успеал сам да го изгасне пожарот.

Москва тврди дека цел на нападите се бродови што превезуваат оружје и стока со двојна намена кон украинските пристаништа. Киев и европските сојузници, пак, посочуваат дека мета се трговски бродови што превезуваат жито и друг цивилен товар.

Турција ги повика двете страни да ги прекинат нападите во Црното Море. Москва повеќепати ги отфрли повиците на САД и Европа за поморски прекин на огнот, а за нападите врз руските трговски бродови ја обвинува Украина.

Рускиот претседател Владимир Путин ја започна инвазијата врз Украина во 2022 година, а Русија во моментов контролира околу 20 отсто од украинската територија.