Премиерот Христијан Мицкоски денеска од собраниската говорница порача дека во новиот Закон за правична застапеност нема да бидат пресудни процентите, туку квалитетот на кадарот, додавајќи дека очекува поддршка од сите пратеници.
Одговарајќи на пратеничко прашање од Скендер Реџепи, премиерот истакна дека секој граѓанин има право да го користи својот мајчин јазик, но оцени дека дел од политичарите се обидуваат да создадат етнички конфликт каде што, според него, не постои.
„Секој има право да го користи својот мајчин јазик. Но, некој се обидува да создава етнички конфликт каде што го нема“, рече Мицкоски.
Во однос на правосудниот испит, премиерот посочи дека законот не пропишува на кој јазик се полага, туку тоа прашање го регулира министерот за правда.
Тој ги критикуваше организаторите на протестите поврзани со правосудниот испит, оценувајќи дека испратиле „лош пример“ и дека не истакнале државно знаме на протестот.
Мицкоски се осврна и на улогата на Венецијанската комисија, нагласувајќи дека станува збор за важно тело во рамки на европската методологија за преговори.
„Не сакам да ги гледам луѓето низ проценти, туку низ квалитет и низ објективна оптика“, изјави премиерот.
Тој најави дека Законот за правична застапеност наскоро ќе се најде пред пратениците во Собранието.
