СДСМ преку соопштение обвини дека економските мерки на Владата предводена од премиерот Христијан Мицкоски не ги намалуваат трошоците за живот, туку, според партијата, придонесуваат за нови поскапувања и дополнително го оптоваруваат семејниот буџет на граѓаните.
Од СДСМ велат дека секоја најава за намалување на цените завршува со нов ценовен раст, како пример го посочуваат последното зголемување на цените на горивата, кое, според нив, следувало по владините најави за намалување на акцизите и поевтинување на горивата.
Во партиското соопштение се наведува дека граѓаните повеќе не очекуваат помош од Владата, туку стравуваат дека секоја нова економска мерка ќе донесе дополнителни финансиски оптоварувања.
СДСМ тврди дека економската политика на Владата резултирала со раст на цените, додека платите не успеваат да го следат зголемувањето на животните трошоци. Воедно, се повикуваат и на изјава на министерката за финансии дека без ребаланс на Буџетот би можело да се појават проблеми со исплатата на платите и пензиите, што, според партијата, укажува на сериозна состојба на јавните финансии.
Од СДСМ посочуваат и дека странските директни инвестиции се намалени за повеќе од 60 проценти, додека државниот долг, според нив, е зголемен за над 2,5 милијарди евра, без тоа да резултира со нови продуктивни инвестиции или подобрување на животниот стандард.
Партијата предупредува дека новото поскапување на горивата ќе предизвика дополнителен раст на цените на транспортот, производството, дистрибуцијата и прехранбените производи, оценувајќи дека товарот повторно ќе падне врз граѓаните.
