Сепаратистите од Шкотска, Велс и Северна Ирска се здружија: „Нашите нации имаат право на самоопределување“

Лидерите на партиите кои се залагаат за отцепување од Обединетото Кралство се сретнаа во Кардиф и порачаа дека иднината на Шкотска, Велс и Северна Ирска ја гледаат во Европската Унија. Шкотската национална партија (SNP), велшката Plaid Cymru и Sinn Fein потпишаа заеднички договор со кој го истакнуваат правото на своите народи на самоопределување. Иако се согласуваат околу долгорочните цели, партиите имаат различни планови за тоа како и кога да се спроведат уставните промени, пренесува „Еуроњуз“.

Домаќин на состанокот во главниот град на Велс беше Рхун ап Иорверт, лидерот на Plaid Cymru. Нему му се придружија шкотскиот премиер и лидер на SNP, Џон Свини, како и високата функционерка на Sinn Fein, Мишел О’Нил, заедно со претседателката на партијата, Мери Лу Мекдоналд.

— реклама —

Учесниците нагласија дека на состанокот присуствувале како партиски лидери, а не како претставници на нивните влади. Во договорот порачаа дека владата на Обединетото Кралство во Вестминстер не треба да ја блокира демократијата.

„Нашите нации имаат право на самоопределување. Ниту една влада во Вестминстер нема право да ја блокира демократијата ниту да го поткопува принципот според кој нашите народи сами ќе одлучуваат за својата иднина“, стои во заедничката изјава.

— реклама —

Свини изјави дека трите партии се „целосно обединети околу принципот на самоопределување“ и додаде дека тоа е „самата суштина на договорот што денес го потпишавме“.

— реклама —

На прес-конференцијата по состанокот, Свини и О’Нил повикаа на одржување референдум за независност на Шкотска, односно за обединување на Ирска. Од друга страна, ап Иорверт од Plaid Cymru не утврди временска рамка за можно гласање за независност на Велс.

Додека SNP и Plaid Cymru се залагаат за целосна независност на своите нации, Sinn Fein како своја цел го истакнува обединувањето на Ирска.

Шкотска веќе одржа референдум за независност во 2014 година, кога 55,3 отсто од гласачите се изјаснија за останување во составот на Обединетото Кралство.

Од Лондон на состанокот реагираа владејачките лабуристи. Тие ја обвинија партијата Plaid Cymru дека сака да ја искористи својата позиција во Велс за да ја разбие Британија.