Серија кражби во Боговиње: од куќи краделе пари, злато и оружје, а однеле и сеф тежок 400 килограми

Основното јавно обвинителство Тетово поведе постапка против четири лица осомничени за продолжено кривично дело – тешка кражба. Според обвинителството, тие во периодот од април до септември годинава извршиле повеќе кражби во села на подрачјето на Општина Боговиње.

— реклама —

Осомничените, според досегашните сознанија, провалиле во повеќе од 10 куќи, од каде што одзеле пари, златен накит и различно огнено оружје што сопствениците го поседувале со дозвола.

— реклама —

При една од кражбите во селото Палчиште, од домот на оштетениот успеале да изнесат и сеф тежок околу 400 килограми.

— реклама —

Вкупната вредност на досега украдените предмети се проценува на околу 15 милиони денари.

Јавниот обвинител продолжува со интензивно обезбедување докази за сите пријавени случаи. По предлог на обвинителството, на двајца од осомничените им е определен краткотраен притвор од 48 часа, додека по другите двајца се трага. За нив притворот ќе започне да се смета од моментот на пронаоѓањето и лишувањето од слобода.