Седум последователни земјотреси биле регистрирани утрово во Црното Море во близина на брегот на Севастопол, соопшти гувернерот на градот, Михаил Развожаев.
Во објава на Телеграм, Развожаев наведе дека според оперативните податоци на Кримската сеизмолошка мрежа, два од потресите биле почувствувани и во Севастопол.
„Еден од земјотресите се случил во 6:14 часот по московско време со магнитуда од 3,7 степени, на околу 26 километри од Севастопол, додека вториот бил регистриран во 8:48 часот со магнитуда од 4,4 степени, на околу 30 километри од градот“, напиша Развожаев.
Тој додаде дека, според досегашните информации, ниту еден објект во Севастопол не е оштетен како последица на земјотресите.
Властите, сепак, предупредија дека не може да се исклучи можноста од дополнителни потреси.
„Ги повикувам сите да останат смирени. Според експертите, редовната сеизмичка активност во нашиот регион е нормална појава“, порача гувернерот.
Засега нема информации за евентуални повредени лица или материјална штета.
