Во текот на изминатото деноноќие, полициски службеници на територијата на целата држава лишиле од слобода шест возачи поради безобѕирно управување со моторни возила, информира Министерството за внатрешни работи.
Според МВР, петмина од приведените управувале возила без возачка дозвола, при што двајца од нив биле малолетници. Дополнително, едно лице било затекнато како управува патничко возило и покрај тоа што имало активна забрана за управување.
По едно лице без возачка дозвола било затекнато во Скопје, Гостивар, Куманово, Кавадарци и Прилеп, при што малолетници биле откриени во Скопје и Гостивар.
Исто така, на Граничниот премин Деве Баир било приведено едно лице кое управувало патничко возило и покрај изречената забрана за возење.
По целосното документирање на случаите, против сите лица ќе бидат поднесени соодветни кривични пријави.
Од Министерството апелираат до сите учесници во сообраќајот доследно да ги почитуваат сообраќајните правила и прописи, да не управуваат возила без положен возачки испит, доколку им е изречена забрана за управување или ако се под дејство на алкохол, со цел заеднички да се придонесе за побезбеден сообраќај.
