Сеута под притисок по мигрантскиот бран: локалниот лидер ѝ постави ултиматум на Владата на Шпанија

Претседателот на шпанската енклава Сеута, Хуан Вивас, ѝ постави рок од 30 дена на шпанската влада да преземе конкретни мерки за решавање на мигрантската криза, во спротивно најави дека ќе побара интервенција од највисоките судски и државни институции.

Вивас остро ја критикуваше владата поради, како што оцени, недостигот од решителна реакција по неодамнешниот голем прилив на мигранти во Сеута.

— реклама —

„Во првите денови од август, владата се обиде да ја разубави реалноста, тврдејќи дека е вратена нормалноста. Потоа следеше речиси целосна пасивност во преземањето мерки за да се стигне до нормалноста“, изјави Вивас на прес-конференција по вонредната седница на локалната влада.

— реклама —

Тој изрази сомнеж дека една од причините за неактивноста може да биде желбата на Мадрид да не го наруши односот со соседната земја, поради што, според него, не се преземаат доволно решителни мерки.

„Се надевам дека тоа не е причината, но зборувам од срце. Мојата намера е ситуацијата да им ја пренесам на претседателот на Врховниот суд и на претседателот на Уставниот суд, доколку сакаат да ме примат. Сеута живее во вонредна состојба“, рече Вивас.

— реклама —

Тој додаде дека на шпанската влада ѝ дава рок од 30 дена значително да ја промени ситуацијата.

— реклама —

Вивас тврди дека по масовниот прилив на мигранти, владата се обидела да создаде впечаток дека кризата е брзо ставена под контрола. Според неговите наводи, властите тврделе дека за 48 часа била воспоставена нормалност и дека од околу 80.000 мигранти што влегле во градот, останале само 2.500.

Градоначалникот, сепак, проценува дека во Сеута сè уште се наоѓаат меѓу 8.000 и 10.000 мигранти.