Северна Кореја ги нападна САД поради оружјето за Тајван: „Вашингтон ги зголемува тензиите“

Северна Кореја ги критикуваше САД поради продажбата на оружје и воената поддршка за Тајван, оценувајќи дека американската политика дополнително ги зголемува тензиите во Тајванскиот Теснец.

Во коментар објавен од севернокорејската државна агенција КЦНА, кој се повикува на аналитичарот за меѓународни прашања Ким Мјонг Чол, се наведува дека американската политика кон Тајван го нарушува мирот и стабилноста во регионот.

— реклама —

Пјонгјанг особено го критикувал пристигнувањето на американските борбени авиони што Вашингтон му ги продал на Тајван. Северна Кореја порача дека САД треба внимателно да размислат дали се подготвени да влезат во директен судир со Кина поради безбедноста на Тајван и да ги преземат последиците од таков развој.

Првите два од вкупно 66 нови борбени авиони Ф-16В „Блок 70“, нарачани во 2019 година, минатата недела пристигнале на Тајван, кој се соочува со зголемена воена закана од Пекинг.

— реклама —

Кина го смета демократски управуваниот Тајван за дел од својата територија и бара да нема официјални контакти меѓу тајванските власти и странски држави. Тајванската влада, пак, го отфрла правото на Пекинг да полага право на островот или да го претставува на меѓународната сцена.

Северна Кореја е сојузник на Кина, која повеќепати барала од Вашингтон да ја прекине продажбата на оружје за Тајван. САД, иако немаат формални дипломатски односи со Тајван, со закон се обврзани да му обезбедуваат средства за самоодбрана.

Во меѓувреме, севернокорејскиот лидер Ким Џонг Ун во одделна порака до рускиот претседател Владимир Путин вети дека Пјонгјанг ќе продолжи да ја поддржува Русија и нејзините воени напори.

— реклама —

Ким навел дека Северна Кореја ќе продолжи да ја проширува соработката со Русија во рамките на сеопфатното стратешко партнерство меѓу двете земји. Тој изразил уверување дека рускиот „свет рат на правдата“ за одбрана на суверенитетот, безбедносните интереси и територијалниот интегритет ќе заврши со победа. Во пораката не се споменува директно војната во Украина.

Според проценките на Украина и Јужна Кореја, Северна Кореја од 2024 година испратила меѓу 14.000 и 15.000 војници за поддршка на Русија во конфликтот со Украина.

— реклама —

Односите меѓу Пјонгјанг и Москва значително се зајакнаа откако Владимир Путин и Ким Џонг Ун во јуни 2024 година потпишаа договор за меѓусебна одбрана.