Шасивари ќе бара мислење од Венецијанската комисија за измените поврзани со полагањето на правосудниот испит

Министерството за правда започна консултации со правните факултети и студентите за предложените измени поврзани со полагањето на правосудниот испит. Целта е да се слушнат ставовите на академската заедница и да се дојде до правно издржано решение што ќе ги почитува јазичните права и професионалните стандарди.

— реклама —

Министерот за правда Јетон Шасивари истакна дека измените нема да се носат без учество на засегнатите страни, нагласувајќи дека забелешките и предлозите на студентите и факултетите треба да имаат вистинска тежина.

— реклама —

Предложениот модел треба да овозможи порамноправни услови за кандидатите кои правните студии ги завршиле на различни јазици, без создавање паралелни системи за полагање. Според Шасивари, целта е јазичната инклузивност да се усогласи со единствените професионални стандарди потребни за функционирање на правосудниот систем.

— реклама —

Министерот порача дека Владата е посветена на унапредување на јазичните права, со целосно почитување на Уставот и законите. За дополнителна правна сигурност и усогласеност со европските стандарди, најави дека во краток рок ќе биде побарано мислење од Венецијанската комисија при Советот на Европа.

Шасивари посочи дека Министерството е подготвено да ги разгледа препораките од Комисијата и дека процесот ќе продолжи транспарентно, со вклучување на сите засегнати страни.