Шест години неовластено увезувале и продавале хемикалии без дозволи, кривична пријава за фирма од Струмица и нејзиниот управител

СВР Струмица поднело кривична пријава против правно лице и 50-годишниот Н.Б. од Струмица поради сомнение за недозволена трговија со хемикалии за чиј увоз и промет се потребни посебни одобренија и дозволи.

— реклама —

Според информациите од Министерството за внатрешни работи, пријавата е поднесена до Основното јавно обвинителство Струмица, а Н.Б. во периодот на кој се однесува случајот бил управител со неограничени овластувања во внатрешниот и надворешниот трговски промет на правниот субјект.

— реклама —

Според сомненијата, во периодот од 2020 до 2026 година, фирмата и управителот неовластено увезувале, складирале и продавале стоки чиј промет е ограничен, односно хемикалии од поголема вредност за чија трговија на големо се потребни соодветни одобренија, како и посебни дозволи за увоз.

— реклама —

Од МВР посочуваат дека во повеќе наврати биле вршени купопродажби на хемикалии без потребните одобренија и решенија за трговија на големо. Притоа, воопшто не биле поднесени барања за добивање на потребните документи, а правното лице не било впишано во регистарот на увозници на вакви хемикалии.

Против правното лице и управителот е поднесена кривична пријава за сомнение за сторено кривично дело „недозволена трговија“, казниво според член 277 ставови 4 и 1, во врска со член 45 од Кривичниот законик.