Шест лица пријавени за фалсификување возачки дозволи, вработената во МВР незаконски додавала категории

Одделот за внатрешна контрола при МВР поднесе кривична пријава против шест лица поради сомнение за фалсификување возачки дозволи и нивна употреба со невистинита содржина.

Меѓу пријавените е и Т.С., вработена во МВР како помлад советник за патни исправи во Одделението за управни работи Скопје при Одделот за граѓански работи. Таа е пријавена за четири кривични дела „фалсификување исправа“.

— реклама —

Кривични пријави се поднесени и против Б.А., С.Н., Ј.А., М.А. и Ф.А. за шест кривични дела „фалсификување исправа“ во соизвршителство и едно кривично дело „употреба на исправа со невистинита содржина“.

Според МВР, Т.С. од почетокот на 2025 година до 24 август 2026 година, користејќи ја својата шифра, незаконски менувала податоци во електронскиот систем при постапките за издавање возачки дозволи на С.Н., Ј.А., М.А. и Ф.А.

— реклама —

Таа, како што се сомничи, додавала категории за кои лицата не ги исполнувале законските услови, по што ги одобрувала барањата и овозможувала издавање на возачките дозволи.

— реклама —

Б.А., според пријавата, во договор и соработка со Т.С. посредувал во постапките за фалсификување возачки дозволи за М.А. и Ф.А., иако знаел дека тие не ги исполнуваат законските услови за стекнување на соодветните категории.

Останатите четири пријавени лица, според МВР, знаеле дека не ги исполнуваат условите за конкретните категории, но сепак поднеле барања за издавање возачки дозволи. Барањата потоа биле изменети од Т.С. со додавање категории за кои тие не ги исполнувале условите.

Едно од пријавените лица, според МВР, ја искористило возачката дозвола со незаконски додадена категорија „А“ за управување мотоцикл и со неа ја преминало државната граница, иако знаело дека исправата содржи невистинити податоци.

Одделот за внатрешна контрола против Т.С. ќе поднесе и предлог за поведување постапка за утврдување дисциплинска одговорност. По претходно поднесената кривична пријава, на Т.С. веќе ѝ била изречена задолжителна мерка отстранување, односно суспензија од работното место до завршување на дисциплинската постапка.