Шест телефони, компјутер и УСБ одземени од вишиот обвинител осомничен за противзаконито влијание

Шест мобилни телефони, персонален компјутер и УСБ се пронајдени и одземени при претресите кај 61-годишниот виш јавен обвинител од Битола, кој е осомничен дека во повеќе наврати влијаел врз други обвинители за сторители да добијат поблаги казни, соопшти МВР.

— реклама —

Одделот за сузбивање организиран и сериозен криминал денеска до ОЈО за ГОКК поднел кривична пријава против П.В. (61) од Прилеп за „примање награда за противзаконито влијание“.

П.В. е лишен од слобода, а полицијата извршила претрес во неговиот дом во Прилеп и во службените простории што ги користел.

— реклама —

„Пронајдени и одземени се шест мобилни телефонски апарати, едно УСБ и еден персонален компјутер“, соопшти МВР.

— реклама —

Според сомненијата на полицијата, П.В., во својство на виш јавен обвинител во Вишото јавно обвинителство Битола, во повеќе наврати влијаел врз одлуките што ги носеле други јавни обвинители.

МВР наведува дека целта на влијанието била да се изрекуваат поблаги казни за сторителите.

— реклама —

Кривичната пријава е поднесена поради основано сомнение за кривично дело „примање награда за противзаконито влијание“ од член 359 став 3 во врска со став 2 од Кривичниот законик.