Шестмина граѓани го тужат Трамп поради ограничувањата за медиумите во Белата куќа

Во САД е поднесена тужба против претседателот Доналд Трамп и тројца високи функционери во неговата администрација, со која шестмина граѓани бараат заштита на правото на јавноста да добива независни информации за работата на претседателот и неговата влада.

— реклама —

Тужбата е поднесена пред федералниот окружен суд во Њујорк, а меѓу тужените се и шефицата на кабинетот на Белата куќа, Сузи Вајлс, директорот за комуникации Стивен Чеунг и директорот на Тајната служба, Шон Каран.

Тужителите тврдат дека со ограничувањето на пристапот на одредени медиуми до Белата куќа не се нарушуваат само правата на новинарските организации, туку и правото на граѓаните да бидат информирани преку независно известување. Тие бараат судска забрана со која медиумите што известуваат од Белата куќа би биле заштитени од можни одмазднички мерки, сега и во иднина.

— реклама —

Меѓу шестмината тужители се поранешниот извршен директор на организацијата „Хјуман рајтс воч“ и предавач на Универзитетот Јејл, Кенет Рот, политичкиот новинар Даниел Фрумкин, професорката по историја Беверли Гејџ, наставникот Питер Шмит-Новара, уредникот на порталот „Лофер“ Бенџамин Витс и студентскиот новинар Итан Јанг. Тие наведуваат дека независното известување од Белата куќа им е важно за нивната работа во областа на образованието, новинарството, истражувањето и јавните политики.

— реклама —

„Крајната штета во овој случај ја трпи демократската јавност“, се наведува во тужбата.

Од администрацијата на Трамп одговориле дека никој не може да бара пристап до Овалната соба и дека медиумите што, според нив, шират дезинформации и клевети можат да известуваат и од просторот пред Белата куќа.

Оваа тужба се разликува од претходните правни спорови на администрацијата со медиумите бидејќи во центарот не се новинарите и медиумските организации, туку граѓаните што се потпираат на нивното известување. Во одделни судски постапки се вклучени и Си-ен-ен, Ем-ес НАУ, „Политико“, Асошиејтед прес и „Њујорк тајмс“, кои оспоруваат различни ограничувања на пристапот до претседателот и Белата куќа.