Шведска вежба масовни погреби на загинати војници: Подготовки за најтешкото сценарио

Шведските вооружени сили спровеле голема вежба за постапување со загинати војници, како дел од подготовките на земјата за концептот на целосна одбрана по членството во НАТО во 2024 година.

Вежбата била дел од „Аурора 26“, најголемата национална воена вежба во Шведска во последните децении, во која учествувале околу 18.000 војници од 13 држави. Во посебниот сегмент биле користени повеќе од 500 кукли и вреќи за тела, кои ги претставувале загинатите војници.

— реклама —

Во вежбата учествувале повеќе од 300 припадници на шведската армија, заедно со претставници на Шведската црква, даночната управа и Агенцијата за регрутирање. Биле проверувани сите процедури – од извлекување и идентификација на загинатите, до известување на амбасадите на сојузничките земји и на Меѓународниот комитет на Црвениот крст, како и организација на погреби со воени почести.

Била тестирана и издржливоста на ладилниците за чување на посмртните останки, како и процедурите за погребување.

— реклама —

Командантот на операцијата изјавил дека, според неговите сознанија, ваква вежба последен пат била спроведена во 1952 година. Воениот свештеник, пак, истакнал дека гледката на десетици наредени вреќи за тела ја направила реалноста на воените жртви многу поконкретна.

— реклама —

Според организаторите, планирањето не претставува проценка на бројот на можни жртви, туку е дел од подготовките на институциите за справување со најтешките последици од евентуален вооружен конфликт.

Шведската црква, која има законска надлежност за погребите во земјата, има планови за капацитети за погребување на број што одговара на пет отсто од вкупното население, односно околу 500.000 луѓе. Овој стандард потекнува од периодот на Студената војна и се однесува и на цивилни и на воени жртви. Бројката не е поврзана со конкретна проценка за „Аурора 26“.

Вежбата се одржала од крајот на април до средината на мај, а во нејзини рамки украински експерти за беспилотни летала обучувале припадници на НАТО за тактики за одбрана од дронови. Во јужна Шведска, на островот Готланд и во Балтичкото Море дејствувале сили од САД, Холандија, Франција, Полска и други сојузнички земји.

За Шведска, која со децении одржувала воена неутралност, а последен пат активно учествувала во воен конфликт во 1814 година, ваквите подготовки претставуваат значителна промена во пристапот кон националната безбедност.