Кинескиот претседател Си Џинпинг повика на поголема улога на земјите членки на БРИКС во зачувувањето на мирот и стабилноста, оценувајќи дека војната во Иран предизвикала сериозни последици за населението во регионот.
На самитот на БРИКС во Њу Делхи, Си изјави дека состојбата на Блискиот Исток и во регионот на Заливот продолжува да се менува и дека војната „нанела сериозни загуби“ на луѓето ширум регионот.
„Ситуацијата на Блискиот Исток и во регионот на Заливот продолжува да се менува. Тамошната војна им нанесе сериозни загуби на луѓето ширум регионот и не е во согласност со заедничките интереси на меѓународната заедница“, рече Си, пренесе кинеската новинска агенција Синхуа.
Пекинг понудил да посредува меѓу завојуваните страни со цел да придонесе за воспоставување мир на Блискиот Исток.
„Кина е подготвена да соработува со другите членки на БРИКС за да придонесе кон постигнување мир и стабилност на Блискиот Исток и во регионот на Заливот“, изјави Си.
Кинескиот претседател истовремено ги повика земјите од БРИКС да преземат „пионерска улога“ во напорите за зачувување на мирот и стабилноста во регионот.
