Си Џинпинг во посета на Северна Кореја, Пјонгјанг останува на нуклеарниот курс

Кинескиот претседател Си Џинпинг денеска пристигна во Пјонгјанг во официјална посета на Северна Кореја, прва по 2019 година, со што беше испратена порака за продолжување и продлабочување на односите меѓу двете земји.

На аеродромот во главниот град на Северна Кореја, Си беше пречекан од лидерот Ким Џонг Ун со највисоки државни и воени почести. Според кинеските државни медиуми, свечениот пречек бил проследен со транспаренти на кои биле истакнати пораки за пријателството меѓу двете држави.

— реклама —

Во обраќањето по пристигнувањето, Си Џинпинг оцени дека односите меѓу Кина и Демократска Народна Република Кореја влегуваат во нова фаза на развој и се соочуваат со нови можности и предизвици.

— реклама —

Тој нагласи дека одржувањето и зајакнувањето на билатералните односи претставува долгорочна и непроменлива политика на кинеското раководство и изрази подготвеност за натамошно продлабочување на соработката со Пјонгјанг.

Посетата доаѓа во период на засилени геополитички тензии, откако сестрата на севернокорејскиот лидер, Ким Јо Џонг, ден претходно порача дека Северна Кореја никогаш нема да се откаже од својата нуклеарна програма.

— реклама —

Таа изјави дека Пјонгјанг ќе продолжи да го развива својот нуклеарен арсенал и ги отфрли повиците на САД за денуклеаризација, оценувајќи ги како нереални и застарени.

Ким Јо Џонг ги негираше и тврдењата дека Кина и САД постигнале согласност околу денуклеаризацијата на Северна Кореја, наведувајќи дека таквите информации не одговараат на реалноста.

— реклама —

Аналитичарите оценуваат дека посетата на Си Џинпинг претставува значаен дипломатски сигнал за блиските врски меѓу Пекинг и Пјонгјанг во време на зголемени глобални безбедносни предизвици.