Американската телевизија Си-Ен-Ен во анализа оценува дека војната со Иран би можела да стане грешката што ќе го одбележи претседателскиот мандат на Доналд Трамп, предупредувајќи дека американскиот лидер е заглавен во конфликт што не може лесно ниту да го добие, ниту да се повлече од него.
Во анализата се наведува дека Трамп досега избегнал масовна ескалација на судирот, но дека сѐ уште се наоѓа пред три тешки избори – да ја продолжи сегашната ограничена воена кампања, да ја засили офанзивата со напади врз цивилни и инфраструктурни цели во Иран или да се повлече без да ги оствари главните цели.
Според Си-Ен-Ен, секоја од овие опции носи сериозни политички и стратешки последици, а историјата покажува дека американските претседатели кои ги ескалирале војните во Виетнам, Ирак и Авганистан честопати западнале во уште подлабоки конфликти.
Анализата доаѓа во време кога Трамп повторно му се закани на Иран, предупредувајќи дека тоа е „последна шанса“ за постигнување договор и дека во спротивно земјата ќе се соочи со „обезглавување“.
Си-Ен-Ен оценува дека евентуалните напади врз иранската инфраструктура би можеле да предизвикаат силен одговор од Техеран, вклучително и напади врз цели на американските сојузници во Персискиот Залив, што дополнително би ја продлабочило кризата.
Во анализата се прави паралела со одлуките на поранешните американски претседатели Линдон Џонсон, Ричард Никсон, Џорџ В. Буш и Барак Обама, кои, според телевизијата, се соочиле со слични дилеми околу ескалација или повлекување од долготрајни воени конфликти.
„Војната во Иран не е на Буш. Таа е на Трамп. И таа ќе го одреди неговото наследство и судбината на многу животи надвор од Белата куќа“, заклучува Си-Ен-Ен.
