„Си одам со нарушено здравје, но горд на себе“: Докторот Василевски го заврши шестдневниот протест со гладување пред Деканатот на Медицинскиот факултет

Докторот Дарко Василевски го заврши шестдневниот штрајк пред Деканатот на Медицинскиот факултет, порачувајќи дека и покрај нарушеното здравје, си заминува со крената глава затоа што, како што вели, укажал на неправдата со која се соочуваат дел од медицинските лица.

Василевски во објава по завршувањето на штрајкот посочува дека се надева оти неговиот случај ќе биде поттик во иднина повеќе и погласно да се зборува за ваквите ситуации.

Тој се заблагодари на колегата и пријател, лекар кој дури шестиот ден го посетил и му ја понудил својата поддршка, како и на граѓаните кои, како што наведува, му понудиле помош лично или преку пораки.

— реклама —

„Денес, по краткиот разговор со деканот на Медицинскиот факултет, сфатив дека како Дон Кихот, се борам со ветерници и имам преголеми очекувања од институциите“, напиша Василевски, додавајќи дека во текот на речиси една недела очекувал некој да го праша како е, да побара решение или да му понуди конкретен разговор.

Тој се осврна и на реакциите од дел од своите колеги, од кои, како што наведува, очекувал барем збор на охрабрување. Според него, бил претставуван како неработник, а негови лични податоци биле јавно објавувани со цел да биде дискредитиран.

— реклама —

Василевски вели дека не жали што го кренал гласот и што сам се обидел да се избори за себе и да укаже на неправдите.

„Се надевав дека мојот случај ќе биде лекција како не треба во иднина, дека треба секому да му се даде шанса, праведна, а не да се бројат години или да се влечат врски“, наведува тој.

По шестдневниот штрајк, Василевски вели дека си заминува со нарушено здравје, но горд што издржал и не се откажал под притисок.

— реклама —

Тој најавува дека и понатаму ќе продолжи да се занимава со медицината, да се надградува и едуцира и да го усовршува своето знаење и искуство, со цел да остане посветен на она што, како што вели, отсекогаш му било најважно – да биде добар лекар.

Василевски додава дека фер и транспарентната постапка ќе биде предмет на проверка пред надлежните инспекциски и судски органи.

— реклама —

„Фала ви на сите за поддршката, а јас и понатаму ќе одам против ветерници, не знам како поинаку“, порача тој.