По 15 дена без, како што вели, одговор од надлежните институции, д-р Дарко Василевски денеска започна мирен протест со штрајк со глад пред Деканатот на Медицинскиот факултет во Скопје.
Василевски, лекар и приватен специјализант, преку објава се заблагодари на сите кои му дале поддршка во изминатите денови и порача дека протестот не е насочен кон ниту едно лице.
„Ова не беше одлука која ја донесов лесно. Ова не е насочено кон никого лично“, наведе тој.
На местото каде што протестира, поставил клупа, а во текот на денот најави и поставување шатор. Вели дека таму ќе престојува 24 часа дневно во периодот што следи.
Причината за протестот е спорот околу последниот оглас за вработување двајца доктори по медицина на неопределено време во Институтот за медицинска и експериментална физиологија со антропологија.
Василевски претходно тврдеше дека возраста била земана предвид при неговите претходни конкурирања за работно место на Медицинскиот факултет. Според неговото сведоштво, уште во 2022 година од член на комисијата добил порака дека е „стар“, дека не му е местото таму и дека не може академски да напредува.
На интервјуто во 2023 година, според него, повторно било отворено прашањето за неговата возраст, додека на последниот оглас во 2026 година тврди дека член на комисијата директно му рекол: „Ти си 80-то годиште“.
Василевски вели дека ги исполнувал условите од последниот оглас и дека бил единствениот од кандидатите кој ги поминал сите турнуси од специјализацијата по спортска медицина, чија програма и спроведување ги опфаќа институтот.
На 14 септември Медицинскиот факултет го известил дека за двете работни места се избрани Слободан Доксимовски и Дарко Серафимовски и дека со нив ќе бидат склучени договори за вработување на неопределено време. Во доставеното известување, според документите со кои располага „Скопје1“, не биле наведени критериумите според кои бил извршен изборот.
Два дена подоцна, Василевски писмено побарал од Медицинскиот факултет да му биде доставен бројот на одлуката или решението, заедно со правна поука, со цел да може да ги оствари своите понатамошни права.
Тој тврди дека до моментот на неговите одговори за „Скопје1“ не добил повратен одговор на барањето.
Василевски вели и дека за огласот од 2022 година претходно се обратил до Деканатот, а потоа поднел приговор и претставка до Народниот правобранител. Според неговото сведоштво, по неколку месеци бил известен дека постапката е прекината.
Во однос на последниот избор, тој признава дека нема писмени докази со кои би потврдил дека изборот бил однапред договорен, дека имало влијание, судир на интереси или фаворизирање.
„Конкретни докази во писмена форма немам, но на крај секогаш се вработуваат кандидатите чиишто имиња ќе се спомнат веднаш по објавување на конкурсот“, тврди Василевски.
„Скопје1“ испратил прашања до Ректоратот на Универзитетот „Св. Кирил и Методиј“, Министерството за образование и наука и Министерството за здравство, но до објавувањето на текстот, според доставениот материјал, не биле добиени одговори.
Со почетокот на штрајкот со глад, Василевски бара транспарентно објаснување за постапката и критериумите според кои биле избрани кандидатите.
„Со почит кон институциите, но и со почит кон самиот себе“, порача тој.
Лекар започнува штрајк со глад, обвинува за дискриминација откако трипати бил одбиван на оглас: Солиден специјализант си, но стар си
„Стар си, не ти е местото тука и не можеш академски да напредуваш“ – д-р Дарко Василевски тврди дека ваква порака добил уште во 2022 година, кога конкурирал за работно место на Медицинскиот факултет во Скопје. Четири години подоцна, на нов оглас за истото работно место, вели дека на интервју повторно му била спомената возраста со зборовите: „Ти си 80-то годиште“.Василевски, лекар и приватен специјализант, јавно реагираше на последниот оглас за вработување двајца доктори по медицина на неопределе
Македонија | пред 1 седмица
