Борбата со пожарите во Србија продолжува, а силниот ветер дополнително го отежнува гасењето на огнената стихија на најкритичните точки – во Делиблатската Песочара и на планината Столови кај Краљево.
Пожарот на Столови сè уште не е локализиран. Огнот зафатил повеќе стотици хектари мешана шума и ниска вегетација на тешко пристапен терен, додека силниот ветер што дува од ноќта дополнително ја усложнува ситуацијата.
Уште потешки се условите во Делиблатската Песочара, каде што пожарот зафатил повеќе од 3.000 хектари, главно трева и ниска вегетација. Во гасењето се ангажирани повеќе од 300 пожарникари и спасувачи, припадници на доброволни противпожарни друштва, „Војводинашуми“ и „Србијаводе“, како и припадници на Војската на Србија и Српско-рускиот хуманитарен центар.
Според податоците на српските власти, на територијата на земјата биле регистрирани 40 пожари на отворен простор. Сите, освен пожарите во Делиблатската Песочара и на Столови, биле локализирани или изгаснати.
Во меѓувреме, пожарот во населбата Шумарице во Крагуевац е изгаснат, додека пожарот кај Бованското Езеро во општина Алексинац, каде што гореле околу 60 хектари трева и ниска вегетација низ шумата, е локализиран.
Најавените врнежи кон крајот на денот би можеле дополнително да им помогнат на пожарникарите во справувањето со преостанатите пожари.
