Сиљановска-Давкова: 11 Октомври е вечен завет за чување и развој на татковината

Претседателката Гордана Сиљановска-Давкова упати порака по повод 11 Октомври – Денот на народното востание, истакнувајќи дека овој историски датум претставува вечен завет за зачувување и развој на татковината.

Во обраќањето, таа потсети дека на 11 октомври 1941 година македонските востаници ја започнале борбата против фашистичките окупатори, водени од вековниот стремеж за слободна македонска држава.

— реклама —

„11 Октомври не е само важен историски датум. Тој е незаборавна и небришлива меморија и вечен завет за чување и развој на татковината“, порача Сиљановска-Давкова.

Според претседателката, жртвата на востаниците и партизаните не треба да се памети само преку спомени и историски настани, туку и преку градење држава и општество достојни на нивното дело.

— реклама —

Таа нагласи дека современите предизвици бараат сплотеност, зрелост и мудрост, како и надминување на поделбите и градење свест за заедничкото добро.

„Време е да се однесуваме кон државата како кон заеднички дом, во кој различностите не се повод за делби, туку причина за учење едни од други, за разбирање едни други, за градење свест за заедничко добро“, истакна претседателката.

Сиљановска-Давкова посочи дека е неопходно градење правна и демократска држава во која законите ќе важат за сите, институциите ќе им служат на сите граѓани, а човековото достоинство ќе биде неприкосновена вредност.

— реклама —

Таа оцени дека обврската на денешните генерации не е да ги повторуваат битките на претходниците, туку да ги продолжат нивните идеали преку знаење, право, етика, морал, единство и одговорност.

„На востаниците и на партизаните им должиме заслужена почит што се избориле и ни оставиле држава! Ние, пак, имаме политичка, економска и граѓанска обврска да градиме демократска, правна и просперитетна европска држава“, порача Сиљановска-Давкова.

На крајот од пораката, претседателката им го честиташе празникот на граѓаните.

„Нека ни е честит 11 Октомври – Денот на народното востание!“