Сиљановска-Давкова ги прими светските шампиони и вицешампиони во училишен ракомет

Претседателката Гордана Сиљановска-Давкова денеска ги прими членовите на машката и женската кадетска ракометна репрезентација, кои на Светското првенство во ракомет за средношколци во Скопје постигнаа историски успех.

— реклама —

Машката селекција го освои златниот медал и титулата светски училишен шампион, додека женската репрезентација се закити со сребрен медал и ја освои титулата светски вицешампион.

Честитајќи им за постигнатите резултати, претседателката истакна дека освоените медали се плод на напорна работа, посветеност и талент, нагласувајќи дека младите спортисти достојно ја претставиле државата на светската сцена.

— реклама —

Сиљановска-Давкова оцени дека тие се едни од најдобрите спортски амбасадори на Македонија и посочи дека ракометот има посебно место во македонската спортска историја.

— реклама —

Таа нагласи дека спортот има големо значење во развојот на младите, бидејќи ги учи на дисциплина, тимска работа, солидарност и стремеж кон заедничка цел.

Младите ракометари и ракометарки истакнале дека освоените медали претставуваат признание за вложениот труд, но и дополнителна мотивација за нови успеси во иднина.

На средбата присуствуваа и претставници на Федерацијата на училишен спорт на Македонија, предводени од претседателката Елена Мицковска, која на Сиљановска-Давкова ѝ врачи благодарница за придонесот во развојот и афирмацијата на училишниот спорт.