Сиљановска-Давкова од Софија: Мора да го оживееме духот на регионалната соработка

Претседателката Гордана Сиљановска-Давкова од Самитот на Процесот за соработка во Југоисточна Европа (ПСЈИЕ) во Софија повика на обновување на духот на регионалната соработка и враќање кон принципите врз кои пред три децении беше воспоставен овој процес.

— реклама —

Во своето обраќање, таа предупреди дека Југоисточна Европа се соочува со сериозни предизвици, меѓу кои масовното иселување на младите, стареењето на населението, економското заостанување и влошените геополитички околности.

Според неа, овие проблеми бараат храбро и одговорно лидерство, засновано на солидарност и заеднички интереси, наместо на тесни и парцијални политики.

— реклама —

Сиљановска-Давкова истакна дека процесот на проширување на Европската Унија мора доследно да се темели на Копенхашките критериуми, а динамиката на пристапувањето да зависи исклучиво од напредокот во спроведувањето на реформите.

— реклама —

Повикувајќи се на мислата на бугарскиот писател Георги Господинов дека „кога вратите на иднината се затвораат, минатото станува единствената татковина“, претседателката порача дека Балканот има потреба од дебалканизација преку европеизација.

Таа оцени дека европската интеграција претставува природна, но и геополитичка и безбедносна неопходност, нагласувајќи дека стабилен, просперитетен и европски Балкан е во интерес и на земјите од регионот и на самата Европа.

— реклама —

„Успехот на секоја држава треба да се доживува како успех на целиот регион. Наместо во блокади и поделби, треба да се натпреваруваме во знаење, иновации, култура и економски развој“, порача Сиљановска-Давкова, повикувајќи на поголема регионална одговорност како предуслов за предвидлива и сигурна заедничка иднина.