Претседателката Гордана Сиљановска-Давкова се обрати на Светскиот лидерски форум на Универзитетот Колумбија, истакнувајќи дека проширувањето на Европската Унија кон Западен Балкан не е само техничко прашање, туку клучно за стабилноста и безбедноста на регионот.
Интеграцијата на земјите од регионот не е само техничко прашање, туку и безбедносен императив, за што е неопходна солидарност и стратешка решителност, рече претседателката пред академската заедница.
Таа посочи дека ирационалната билатерализација и злоупотребата на ветото негативно влијаат на довербата во ЕУ.
Ветото не е дел од Копенхашките критериуми. Застојот во политиката на проширување негативно влијае на кредибилитетот на Унијата, рече Сиљановска-Давкова.
Претседателката го истакна и историскиот контекст на Балканот, потенцирајќи дека регионот е интегрален дел од Европа:
Луѓето од Балканот отсекогаш се доживувале себеси како Европејци – географски, историски и културно.
Таа ја нагласи важноста на идеализмот и етиката во политиката:
Она што ни треба е малку повеќе идеализам, а не утопија. Идеализмот значи право, правда, етика, морал. Тимос – да бидеш препознаен“, истакна Сиљановска-Давкова.
Во однос на глобалните институции, таа повика на реформи во рамките на Обединетите нации.
Сè уште верувам во ОН. Но, потребни се длабоки реформи за да се заштитат ранливите институции и да се спречи авторитаризам, рече претседателката.
Студентите на Универзитетот Колумбија поставуваа прашања за македонскиот устав, надворешната политика и состојбите во регионот, а Сиљановска-Давкова нагласи дека солидарноста меѓу земјите-членки е критична за напредокот на регионот и за доказ дека Homo Balcanicus може да биде и Homo Politicus.
