Сиљановска-Давкова: Потребен е еднаков третман на сите земји кандидатки за членство во ЕУ

Претседателката Гордана Сиљановска-Давкова денеска го прими амбасадорот Михалис Рокас, шеф на Делегацијата на Европската Унија, кој ѝ го предаде Извештајот на Европската комисија за напредокот на Македонија за 2026 година.

На средбата двајцата соговорници оцениле дека се постигнати конкретни резултати, поздравувајќи го препознавањето на Македонија како една од најуспешните земји во спроведувањето на Реформската агенда и Планот за раст на Западен Балкан, соопштија од Кабинетот на претседателката.

— реклама —

Амбасадорот Рокас, сепак, укажал на утврдените слабости и потребата од забрзување на реформите во владеењето на правото, правосудството и борбата против корупцијата.

Сиљановска-Давкова посочила дека повисокото ниво на подготвеност во поглавјата 10, посветено на дигиталната трансформација и медиумите, и 26, кое се однесува на образованието и културата, како и напредокот во науката и истражувањето и во усогласувањето со заедничката надворешна, безбедносна и одбранбена политика, го потврдуваат институционалниот капацитет на државата за исполнување на европските стандарди.

— реклама —

Таа очекува финализирањето на патоказите за владеење на правото и реформа на јавната администрација, како и на Акцискиот план за заштита на малцинствата, да донесе видливи промени и напредок во Кластерот „Основи“, стои во соопштението.

— реклама —

Во рамките на своите уставни надлежности, претседателката истакнала дека ќе продолжи да придонесува за спроведувањето на реформите и за јакнењето на демократијата.

Сиљановска-Давкова нагласила дека извештајот треба објективно да го оценува исполнувањето на Копенхашките критериуми, а не наметнувањето билатерални политички услови, за кои оцени дека се спротивни на европските вредности и принципи утврдени во европските уставни акти.

— реклама —

Според неа, изоставувањето на Македонија од групата земји предводнички во процесот на проширување не ја отсликува реалноста и испраќа негативни пораки до македонската јавност.

Претседателката повторно повика на еднаков третман на сите земји кандидатки во пристапниот процес, посочувајќи дека се потребни политичка волја и поактивен ангажман на европските институции и земјите членки за деблокирање на македонскиот пат кон Европската Унија.