извештај

ОН алармира: Секои 10 минути е убивана по една жена – фемицидите достигнаа црн рекорд во 2024 година

Минатата година, светот повторно се соочи со застрашувачки размери на насилство врз жените. Според најновите процени на Обединетите нации, во просек на секои десет минути животот го губела една жена или девојка, убиена од свој партнер или член на семејството.Овие податоци се дел од најновиот глобален извештај за фемициди, што вчера го објавија Канцеларијата на ОН за дрога и криминал (УНОДК) и UN Women. Според анализата, во 2024 година во светот биле убиени околу 83.000 жени и девојки, а речиси 60 отсто од нив биле жртви на лица со кои имале интимна или семејна врска.За споредба, кај мажите само околу 11 проценти од убиствата биле извршени од партнер или роднина – драматична разлика што дополнително ја потврдува родовата специфичност на фемицидот.Регионалните податоци покажуваат дека најголемиот број фемициди минатата година биле забележани во Африка – дури 22.600 случаи. Следува Азија со 17.400, Америка со 7.700, Европа со 2.100 жртви и Океанија со 300.Африканскиот континент, освен по бројот, е водечки и по стапката на фемициди извршени од партнери или семејни членови – три убиени жени или девојки на 100.000. Европа има најниска стапка, од 0,5 на 100.000.Податоците од 2023 година, наведени во минатогодишниот извештај, покажуваат дека од 85.000 жени и девојчиња убиени во насилни околности, 51.100 биле жртви на сопствени партнери или роднини. Новиот извештај потврдува дека трендот не само што продолжува, туку се продлабочува, поставувајќи уште поитна потреба за глобални мерки против насилството врз жените.

Свет | пред 3 седмици

Мицкоски по враќањето од Брисел: „Да ги направиме уставните измени, па нека ни дадат уште едно вето – ќе бидеме шампиони“

Според премиерот Христијан Мицкоски, во однос на Извештајот на Европската комисија, земјава е веднаш зад Црна Гора, односно дека Македонија е заедно со Србија, па дури потоа следува Албанија и другите земји од регионот.-Да ги направиме уставните измени, најдобро ќе биде и потоа да добиеме ново вето и повторно нови проблеми. Тогаш сигурно ќе добиеме „петка“ и ќе бидеме шампиони, вели премиерот, кој истовремено нагласи дека е задоволен од тоа што било објавено за земјава во официјалниот документ од Брисел.-Од она што е напишано, јас сум исклучително задоволен бидејќи нема назадување. Има стагнација во неколку области и тоа сите го зборуваме – владењеето на правото и борбата против корупцијата. Затоа нон-стоп зборувам дека се потребни промени во Судскиот совет, Обвинителството…Сега по завршување на изборите, многу сериозно ќе се занимаваме со таа тема. Во сите области има мал напредок или значителен. Генерално Извештајот го оценувам како добар, порача Мицкоски.

Македонија | пред 1 месец

Црна Гора „одлична“, Албанија со „шестка“, а Македонија со „тројка“ во новиот извештај на Европската комисија

Црна Гора повторно го задржа статусот на „најнапреден ученик“ во процесот на проширување на Европската унија, добивајќи „одлична оценка“ во најновиот извештај на Европската комисија за напредокот на земјите кандидати. Албанија е оценета со „шест минус“, Молдавија со „пет плус“, а Украина доби стабилна „петка“ за своите реформи и напредок во усогласувањето со европските стандарди.Црна Гора дури се споменува како потенцијална нова членка на ЕУ уште во 2027 година.Македонија, пак, е оценета со „тројка“ – резултат што покажува ограничен напредок и задржување на речиси исто ниво како минатата година. Во документот, според бриселскиот портал „Политико“, земјата е ставена во групата на држави кои се „задржани на час“, заедно со Србија и Босна и Херцеговина, оценети со „двојка“.Иако Северна Македонија во 2019 година го постигна историскиот договор со Грција и го промени името, процесот на преговори со Европската унија останува блокиран поради нерешениот спор со Бугарија и барањето за уставни измени – односно вклучување на бугарската заедница во Преамбулата на Уставот.Во извештајот се очекува да се констатира одреден економски напредок и целосно усогласување со надворешната и одбранбената политика на Унијата, но генералната оценка останува непроменета – „без значителен напредок во споредба со минатата година“, пренесува „Политико“, повикувајќи се на извори од Европската комисија.Според извештајот, Турција и натаму е опишана како „ученик кој бега од часови“, со оглед дека преговорите со неа се замрзнати уште од 2018 година поради проблеми со владеењето на правото и човековите права.Косово, кое сè уште не е официјален кандидат за членство, останува на маргините на процесот додека не биде признаено од сите земји-членки на ЕУ.Еврокомесарката за проширување Марта Кос треба попладнево да го претстави целиот пакет извештаи пред членовите на Комитетот за надворешни работи на Европскиот парламент. По презентацијата ќе следи расправа посветена на резултатите и предизвиците на земјите кандидати и потенцијални кандидати во нивниот пат кон Европската унија.Европската комисија во документот уште еднаш ја нагласува својата подготвеност да го продолжи процесот на проширување и визијата за „обединета Европа“, но воедно укажува на пропустите и слабостите во спроведувањето на реформите во секоја од државите кандидати.

Македонија | пред 1 месец

Матните и бистрите настани во јули според Транспаренси: Обвинението за Димитровска, Извештајот на ЕК за Македонија...

Транспаренси Интернешнл – Македонија го објави месечниот извештај за најматни и најбистри настани во земјата за месец јули, во кој највисоко на листата на сомнителни случувања се најде обвинението против претседателката на ДКСК, Татјана Димитровска.Според организацијата, Димитровска се соочува со сериозни обвинувања за злоупотреба на службена положба и оддавање службени тајни. Таа, според Обвинителството, незаконски изнесувала и фотографирала документи поврзани со набавки на адитиви во енергетскиот сектор, меѓу кои и податоци за обвинетиот Небојша Стојановиќ во предметот „Адитив“. Исто така, било откриено дека Димитровска и уште еден државен службеник – ревизор – нелегално пристапиле до системот за класифицирани информации. Ревизорот, користејќи нејзини кодови, присуствувал на обуки и полагал тестови во нејзино име за да се стекне со безбедносен сертификат „државна тајна“.Други „матни“ настани, според извештајот, вклучуваат:Годишниот извештај на Европската комисија за владеење на правото во Македонија, во кој се нотира загриженост за мешање на извршната власт во судството, слабости во антикорупциските реформи, политизирано разрешување на главниот обвинител и нарушување на поделбата на власта.Раскриена криминална мрежа поврзана со злоупотреба на системот за инвалидски пензии и туѓа нега, во која се вмешани лекари, адвокати и службеници. Осомничените, делувајќи преку две криминални групи, овозможувале незаконско стекнување на права за надоместоци, за што наплатувале од 150 до 5.000 евра.Сериозни слабости во работењето на Фондот за здравствено осигурување за 2023 година, како што се отсуство на интегрирани ИТ-системи, недоволни контроли и ризик од неправилно користење на јавни средства, нотирани во извештајот на Државниот завод за ревизија.Финансиски и системски неправилности кај Државното правобранителство, вклучително и нетранспарентни јавни набавки, нерегулирани договори на дело и нејасни процедури за оценка на вработените.ЈП за стопанисување со спортски објекти, кое формално не постои од 2017 година, но сѐ уште функционира, без ажурирани пописи и со изгубена или одземена документација.Недоволен буџет за здравство и застој во изградбата на клинички центри, според ревизорскиот извештај за 2023 година. Дваесет и три програми се реализирале со недоволни средства, што довело до слаба ликвидност на јавните здравствени установи и недостиг од лекови.Ревизија на Основен суд Прилеп, која укажува на несоодветна евиденција, одсуство на внатрешна ревизија и недефинирани платни правила.Случај со заменик директор на Институтот за сточарство и рибарство при УКИМ, за кој ДКСК утврди судир на интереси, поради деловни релации со фирма во која сопственик е неговата сопруга.„Бистри“ настаниВо позитивниот дел од извештајот, Транспаренси Интернешнл издвојува:Апсењето на очна докторка во Клиничката болница во Битола, откако од пациент примила пари за лекарска услуга. Министерството за здравство најави дисциплинска постапка и ги повика граѓаните да пријавуваат неправилности преку платформата „Пријави неправилност“.Обвинение против директорот на ЈЗУ „13-ти Ноември“ – Скопје, кој, според ОЈО за гонење организиран криминал, побарал 20.000 евра за прием на пациент во тешка здравствена состојба.Обвинение за злоупотреба на службена положба против поранешен в.д. претседател на СУНРСМ, кој, според Обвинителството, со пропусти во работењето нанел значителна штета на буџетот на институцијата.Новина на веб-страницата на Министерството за здравство, каде граѓаните отсега ќе можат анонимно да пријавуваат неправилности во здравствениот систем, со можност за контакт доколку е потребна дополнителна информација. Податоците од пријавите ќе се објавуваат месечно.

Македонија | пред 4 месеци

Бојко Борисов подава рака на Македонија, Бугарија задоволна од усвоениот Извештај

Откако денеска беше усвоен Извештајот на Европскиот парламент за напредокот на Македонија без да се спомене во него македонскиот јазик и идентитет, официјална Софија веднаш изрази задоволство од документот.,,Со својата резолуција за извештајот за напредокот на Република Северна Македонија, Европскиот парламент не дозволи тој да биде инструментализиран за потребите на внатрешната политичка дебата на земја-кандидат“, коментираше министерот за надворешни работи Георг Георгиев.Реагираше и лидерот на ГЕРБ, Бојко Борисов.,Драго ми е што гласот на Бугарија беше слушнат.Повторно им подавам рака на нашите пријатели во Северна Македонија да продолжиме напред заедно, врз основа на почитување и спроведување на Договорот за пријателство и добрососедство. Во мене и во лицето на Бугарија, тие секогаш ќе имаат искрен и близок партнер”, изјави Борисов.

Македонија | пред 5 месеци

Мицкоски по усвојувањето на извештајот во ЕП: Ова е нашиот Крушевски манифест – нема да дозволиме ново предавство

По изгласувањето на извештајот за напредокот на Македонија во Европскиот парламент, од чии финални формулации беа отстранети споменувањата на македонскиот јазик и идентитет, премиерот Христијан Мицкоски остро реагираше, нарекувајќи го овој момент „нов Крушевски манифест“ за Македонија.„Македонската историја е втемелена врз предавства и неправди. Тоа не е ексклузивитет на современата Македонија, туку болка која ја носиме низ вековите. Неправдата е составен дел од нашето секојдневие, но нека го чуе секој: денешниот ден не е ништо ново за нас“, порача Мицкоски.Тој оцени дека со гласањето во Европарламентот вистината излегла на површина и дека ЕУ јасно покажала што очекува од Македонија – услови кои не важат за ниту една друга држава-кандидат.„Тоа се политичари од врвен калибар, кои совршено знаат што е суштината на овие барања. Сега сè им е сервирано на тацна. Не сакам никој повеќе да ми зборува дека бугарското малцинство е проблем – уште утре можеме да го внесеме во Уставот. Но суштината е поинаква. Проблемот не е во тоа, туку во триесетгодишната стратегија која ја водат низ европските ходници против македонската нација“, рече тој.Премиерот додаде дека државата, од независноста до денес, направила бројни отстапки и помирувања, но дека вистинскиот проблем е што нејзините лидери со децении не воделе сметка за националниот интерес.„Оваа борба е и ќе биде тешка. Но ќе успееме. Малубројна земја сме со големо срце. Ги почитуваме соседите, дури и кога ќе ги фатиме живи како работат против нас. Но без взаемна почит, нема да постигнат ништо. Кога ќе почнат да не почитуваат – ќе ни бидат најголем пријател“, истакна тој.Најави дека нема да дозволи ново предавство ниту отстапување од македонските национални интереси, нагласувајќи дека неговата функција е минлива, но целта останува.„Јас сум само моментален функционер, но работам ден и ноќ за да ја реализирам целта – достоинствено членство во ЕУ. Тоа не е само цел, туку потреба за нашата држава“, рече Мицкоски.Во својата изјава тој посочи и дека моменталната блокада од Унгарија не е единствената причина за застојот во евроинтеграциите, туку дека проблемите датираат уште од 90-тите години, кога Македонија беше признаена како држава, но не и како нација.„Нашиот источен сосед има поинаква агенда. Работеа против нас повеќе од три децении. Водени се од мислата да ја уништат македонската нација и идентитет“, изјави премиерот Мицкоски.

Македонија | пред 5 месеци