Муцунски: Напредокот во надворешната и безбедносната политика е потврден со највисоки оценки

Министерот за надворешни работи и надворешна трговија, Тимчо Муцунски, оценува дека последниот извештај на Европската комисија потврдува напредок во повеќе области, но укажува и на потребата од дополнителни реформи на патот кон членство во Европската Унија.

— реклама —

Во гостувањето на Сител телевизија, Муцунски посочи дека извештајот дава реална слика за состојбите во државата и треба да се гледа како насока за подобрување на институциите и условите за граѓаните, а не само како обврска кон Брисел.

Тој нагласи дека Македонија повеќе години по ред добива највисоки оценки за усогласеноста со надворешната, безбедносната и одбранбената политика на ЕУ. Сепак, посочи дека реформите во правосудството и борбата против корупцијата остануваат области во кои се потребни конкретни резултати, особено во справувањето со високата корупција.

— реклама —

Говорејќи за процесот на проширување, Муцунски оцени дека позитивни се механизмите за постепена интеграција, пристапот заснован на заслуги и напорите за намалување на билатерализацијата. Според него, потребна е заедничка посветеност на реформите и создавање сигурна и предвидлива рамка за европскиот пат на земјата.

— реклама —

Во однос на отворените прашања, министерот истакна дека решенијата треба да се бараат врз основа на јасни принципи, без однапред зададени рокови и без прифаќање решенија по секоја цена. Тој нагласи дека Владата продолжува да работи на европската интеграција, но мора да ги земе предвид и можните последици од секоја преземена обврска.

Муцунски посочи дека домашните реформи и решавањето на политичките прашања треба да се одвиваат паралелно. Додаде дека европските вредности подразбираат и меѓусебно почитување на идентитетите, јазиците и културите, а решение е можно доколку постои волја од двете страни.

— реклама —

„Нашиот императив не треба да биде решение по секоја цена“, порача Муцунски, нагласувајќи дека Македонија останува посветена на европската интеграција и на спроведувањето на потребните реформи.