Минатата година, светот повторно се соочи со застрашувачки размери на насилство врз жените. Според најновите процени на Обединетите нации, во просек на секои десет минути животот го губела една жена или девојка, убиена од свој партнер или член на семејството.
Овие податоци се дел од најновиот глобален извештај за фемициди, што вчера го објавија Канцеларијата на ОН за дрога и криминал (УНОДК) и UN Women. Според анализата, во 2024 година во светот биле убиени околу 83.000 жени и девојки, а речиси 60 отсто од нив биле жртви на лица со кои имале интимна или семејна врска.
За споредба, кај мажите само околу 11 проценти од убиствата биле извршени од партнер или роднина – драматична разлика што дополнително ја потврдува родовата специфичност на фемицидот.
Регионалните податоци покажуваат дека најголемиот број фемициди минатата година биле забележани во Африка – дури 22.600 случаи. Следува Азија со 17.400, Америка со 7.700, Европа со 2.100 жртви и Океанија со 300.
Африканскиот континент, освен по бројот, е водечки и по стапката на фемициди извршени од партнери или семејни членови – три убиени жени или девојки на 100.000. Европа има најниска стапка, од 0,5 на 100.000.
Податоците од 2023 година, наведени во минатогодишниот извештај, покажуваат дека од 85.000 жени и девојчиња убиени во насилни околности, 51.100 биле жртви на сопствени партнери или роднини. Новиот извештај потврдува дека трендот не само што продолжува, туку се продлабочува, поставувајќи уште поитна потреба за глобални мерки против насилството врз жените.
