Македонија почесто на страната на ЕУ отколку на САД при гласањата во ОН, тврди Милошоски

Македонија во периодот од 2024 до 2026 година во 148 случаи гласала во согласност со мнозинството земји членки на Европската Унија, а различно од Соединетите Американски Држави, додека само во шест случаи го поддржала американскиот став спротивно на европското мнозинство. Овие податоци ги изнесе пратеникот и член на Извршниот комитет на ВМРО-ДПМНЕ, Антонио Милошоски, во емисијата „Надворешна – Светот во дијалог“ на Македонската радио-телевизија.

Според Милошоски, статистиката се однесува на гласањето за резолуции, декларации и други акти во Обединетите нации, во ситуации кога земјите членки на ЕУ немале усогласен заеднички став.

— реклама —

„Македонија само шест пати од 2024 до 2026 година гласала исто како САД, а спротивно на мнозинството членки на ЕУ, во момент кога ЕУ немала заеднички став. Во спротивен случај сме гласале како мнозинството земји членки на ЕУ, а различно од САД, 148 пати“, изјави Милошоски.

Тој оцени дека ваквиот сооднос покажува оти Македонија има високо ниво на усогласеност со европската надворешна и безбедносна политика, и покрај стратешкото партнерство со Вашингтон.

— реклама —

„Кога ЕУ има утврдена заедничка надворешна и безбедносна политика, нашиот глас е придружен на ЕУ како целина“, рече Милошоски.

Говорејќи за меѓународната позиција на државата, тој посочи дека Македонија може истовремено да го продлабочува партнерството со САД и да ги зајакнува политичките и економските односи со европските држави.

Според него, односите со Вашингтон и Брисел не треба да се поставуваат како избор меѓу две спротивставени страни, бидејќи европската безбедност и економскиот развој во изминатите децении биле тесно поврзани со американската поддршка.

— реклама —

„Европскиот економски успех и демократијата не би биле толку напредни и можни да ја немало американската стабилност и безбедносна поддршка во изминативе 60 години“, изјави Милошоски.

Тој ги спореди трансатлантските односи со маса што се потпира на четири ногарки, од кои две се европски, а две американски, оценувајќи дека станува збор за меѓусебно зависно партнерство.

Милошоски смета дека Македонија треба да продолжи со дијалогот за стратешко партнерство со САД, но истовремено да ги развива односите со Германија, Австрија, Италија, Хрватска, Словенија и другите земји од регионот.

Според него, регионалната соработка е важен дел од меѓународното позиционирање на државата, а одржувањето блиски односи и со американските и со европските партнери е компатибилно со нејзините надворешнополитички приоритети.