Обединетите нации соопштија дека постои стравување оти повеќе од 500 лица загинале во два големи бродолома што се случиле кај брегот на Мјанмар од крајот на јуни.
Меѓународната организација за миграција (ИОМ) и Агенцијата на ОН за бегалци (УНХЦР) во заедничко соопштение изразија сериозна загриженост поради извештаите дека два брода со повеќе од 500 патници можеби се превртеле во близина на брегот на Мјанмар.
Според првичните информации, двата брода испловиле кон крајот на јуни од со војна погодената држава Ракајн, а најголемиот дел од патниците биле припадници на муслиманското малцинство Рохинџа. Дел од нив, според извештаите, тргнале од големите бегалски кампови во Кокс Базар во Бангладеш, каде што повеќе од еден милион бегалци живеат во тешки услови.
Според ОН, контактот со едниот брод, на кој се претпоставува дека имало околу 250 лица, бил изгубен кратко по испловувањето. За вториот брод, на кој наводно имало околу 280 патници, се верува дека потонал на 8 јули во близина на брегот на регионот Ајејарвади.
Од ИОМ и УНХЦР нагласуваат дека информациите сè уште не се официјално потврдени, но предупредуваат дека, доколку се покажат како точни, станува збор за катастрофална загуба на човечки животи.
Агенциите посочуваат дека патувањата биле преземени надвор од вообичаената сезона за пловидба, кога временските услови на морето се значително поопасни. Дополнителен ризик претставуваат и обилните дождови и поплавите што неодамна го зафатија регионот.
Рохинџите секоја година тргнуваат на опасни патувања со дотраени пловни објекти, кои често ги организираат мрежи за криумчарење луѓе, во обид да стигнат до побезбедни места. Според податоците на УНХЦР, само минатата година речиси 900 бегалци Рохинџа се воделе како исчезнати или загинати во северниот дел на Индискиот Океан.
Од Обединетите нации предупредуваат дека најновите трагедии ја нагласуваат тешката состојба предизвикана од долготрајниот конфликт во Мјанмар, присилното раселување и недостигот од трајни решенија за заедницата Рохинџа.
ИОМ и УНХЦР повикаа на засилени операции за пребарување и спасување, обезбедување пристап до азил и заштита за бегалците, како и на поодлучна борба против мрежите за криумчарење и трговија со луѓе. Истовремено, тие ја истакнаа потребата од континуирана меѓународна поддршка за Бангладеш, кој со години прифаќа голем број бегалци Рохинџа, како и од поголеми напори за решавање на причините за нивното присилно раселување.
