Сиљановска-Давкова предупредува: Авторитаризмот и олигархијата се засилуваат и во држави со вековна демократија

Претседателката Гордана Сиљановска-Давкова предупреди на продлабочување на поделбите во светот, засилување на авторитарните тенденции и растечка милитаризација, оценувајќи дека дури и државите со долга демократска традиција не се имуни на овие процеси.

На средба со група поранешни студенти на Универзитетот Харвард, кои престојуваат во Македонија во рамките на студиско патување низ Балканот, Сиљановска-Давкова говорела за глобалните безбедносни, економски, енергетски, етички и морални предизвици, со посебен осврт на состојбите во Европа.

— реклама —

Според соопштението од нејзиниот кабинет, претседателката укажала на опасноста од продлабочување на внатрешните поделби во општествата, како и од нови регионални и меѓународни судири во услови на растечка мултиполарност.

Таа посочила дека авторитарните и олигархиските тенденции се засилуваат и во земји со вековна демократска традиција, додека забрзаната милитаризација дополнително ја усложнува меѓународната состојба. Истовремено, предупредила на маргинализацијата на меѓународните организации, меѓу кои и Обединетите нации, создадени врз принципите на мултилатерализмот.

— реклама —

Одговарајќи на прашања за причините за насилните протести во повеќе држави, Сиљановска-Давкова го поврзала растечкото незадоволство со слабеењето на социјалната улога на државите, продлабочувањето на јазот меѓу богатите и сиромашните и зголемувањето на апатијата и безнадежноста.

Особено внимание посветила на младите, кај кои, според нејзината оценка, сè поизразени се чувствата на безнадежност и општествена несигурност, што може да придонесе за пораст на насилството.

— реклама —

Во разговорот била отворена и темата за македонската дијаспора. Претседателката оценила дека нејзиниот образовен, научен и професионален капацитет претставува значаен, но недоволно искористен потенцијал за развојот на Македонија.

Гостите од Харвард ја запознале со своите досегашни посети во регионот и со впечатоците од Македонија, каде што имале можност да се запознаат со културно-историското наследство и современите општествени процеси.

Сиљановска-Давкова го поздравила нивниот интерес и нагласила дека ваквите средби овозможуваат размена на знаења и искуства, преиспитување на сопствените ставови и подобро разбирање на меѓународните предизвици.

Како универзитетска професорка, таа ја истакнала и важноста на академскиот дијалог за препознавање на општествените проблеми и пронаоѓање решенија за нивно надминување.