Сиљановска-Давкова се сретна со претставници на Проект ХОУП и Фондацијата БД

Претседателката Гордана Сиљановска-Давкова денеска оствари средба со извршниот директор на Проект ХОУП (Project HOPE), Раби Торбеј, и претседателката на Фондацијата БД (Becton, Dickinson and Company Foundation), Сиен Авалос, на која беше истакнато значењето на меѓународната поддршка за унапредување на здравствениот систем во Македонија.

— реклама —

Сиљановска-Давкова посочи дека Проект ХОУП повеќе од три децении придонесува за јакнење на здравствените капацитети, унапредување на знаењата и вештините на здравствените работници и воведување современи технологии во здравството.

Таа ги поздрави донациите на современа медицинска опрема, примената на иновативни методи и вложувањата во човечките ресурси преку клинички обуки со меѓународна експертиза.

— реклама —

Според претседателката, меѓународните партнерства имаат важна улога во создавањето одржливи системски решенија што на долг рок ќе придонесат за подобрување на квалитетот на здравствените услуги.

— реклама —

Оценувајќи ја работата на Проект ХОУП како исклучително успешна и инспиративна, Сиљановска-Давкова се заблагодари за посветеноста и присуството на организацијата во Македонија.

Торбеј и Авалос ги претставиле досегашните и тековните здравствени и хуманитарни програми и активности. Тие изразиле задоволство од соработката со македонските институции, особено со здравствените работници, и ја потврдиле подготвеноста за продолжување на помошта и поддршката.

Проект ХОУП е глобална организација со 65-годишно искуство, која е присутна во повеќе од 25 земји.