Сиљановска-Давкова ги прими акредитивите на новоименуваната британска амбасадорка, Сивањанам

Претседателката Гордана Сиљановска-Давкова ги прими акредитивните писма на новоименуваната амбасадорка на Обединетото Кралство на Велика Британија и Северна Ирска, Маја Сивањанам.

— реклама —

На средбата беше истакнато долгогодишното македонско-британско пријателство, чии корени датираат од крајот на 19. и почетокот на 20. век, како и значењето на стратешкото партнерство за поттикнување нови инвестиции во транспортот, енергетиката и здравството.

— реклама —

Сиљановска-Давкова нагласи дека двете земји, како сојузници во НАТО, имаат заедничка одговорност за зачувување на мирот и стабилноста во Европа. Таа се заблагодари за долгогодишната британска поддршка во реформите на одбраната и военото образование.

Амбасадорката Сивањанам изрази подготвеност за продлабочување на соработката со македонските институции, посочувајќи ја важноста на владеењето на правото, демократијата, образованието на младите и унапредувањето на еднаквоста и инклузијата.

— реклама —

Двете соговорнички оценија дека постојат можности за поширока соработка во културата, науката и образованието, особено преку програмите на Британскиот совет и стипендиите „Чивнинг“.

На крајот од средбата, претседателката ѝ посака на амбасадорката добро здравје, среќа и успех во извршувањето на дипломатската функција.