Сиљановска-Давкова во пресрет на COP31: Климатските обврски да ги претвориме во конкретни инвестиции и мерливи резултати

Претседателката Гордана Сиљановска-Давкова порача дека Македонија мора да ги претвори климатските обврски во конкретни инвестиции и мерливи резултати, истакнувајќи дека справувањето со климатските промени бара заедничка акција, одговорност и навремена превенција.

— реклама —

На настанот „Национален дијалог во пресрет на COP31“, организиран од УНДП во соработка со министерствата за животна средина и просторно планирање и за енергетика, рударство и минерални суровини, Сиљановска-Давкова оцени дека климатските промени одамна не се само прашање на заштита на природата, туку системска криза што ги погодува сите сегменти на општеството.

Таа предупреди дека Македонија, како дел од климатски ранливиот медитерански регион, веќе се соочува со последиците од сушите, поплавите, шумските пожари и аерозагадувањето. Според извештајот на Светската банка што го посочи претседателката, загубите од катастрофи и екстремни климатски настани во изминатите 20 години се проценуваат на 667 милиони американски долари, а без инвестиции во адаптација годишните штети би можеле да достигнат четири проценти од БДП до 2050 година.

— реклама —

Сиљановска-Давкова ја нагласи потребата од што побрзо усвојување на Законот за климатска акција, за кој, како што информираше, Европската комисија дала зелено светло во однос на усогласеноста со европското законодавство. Таа посочи дека, покрај законската рамка, потребни се и инвестиции во адаптација и зајакнување на отпорноста на државата.

— реклама —

Како една од предложените мерки го издвои воспоставувањето на Национален интегриран мултихазарден информативен систем за превенција од катастрофи, кој би овозможил поврзување и надградба на постојните капацитети, подобро користење на податоците и навремено предупредување при топлотни бранови, суши, бури, поплави и шумски пожари.

Во пресрет на COP31 во Анталија, каде што ќе ја предводи македонската државна делегација, претседателката порача дека земјата треба да настапи со јасни национални приоритети, подготвени проекти и прецизно утврдени потреби за финансирање. Таа повика на поголема соработка меѓу институциите, научната јавност, општините и приватниот сектор, со цел климатските заложби да се преточат во конкретни резултати.

Во обраќањето, Сиљановска-Давкова истакна дека одговорноста за заштитата на природата ја имаат сите – од институциите и бизнис-секторот до медиумите и граѓаните. Таа повика на промена на начинот на размислување и изградба на општествен договор со природата, во кој таа ќе се третира како партнер, а не како противник.