Сиљановска со средба со Ван дер Белен: Австрија ја потврди поддршката за македонскиот евроинтегративен пат

Претседателката Гордана Сиљановска-Давкова денеска во Анталија оствари средба со претседателот на Република Австрија, Александер Ван дер Белен, на маргините на Конференцијата на страните на Рамковната конвенција на Обединетите нации за климатски промени (COP31).

— реклама —

На средбата биле потврдени одличните билатерални односи меѓу Македонија и Австрија, кои се темелат на заемна почит, пријателство, соработка и споделени европски вредности.

Сиљановска-Давкова изразила благодарност за принципиелната поддршка што Австрија ѝ ја дава на Македонија на патот кон Европската Унија, како и за нејзината посветеност на стабилноста, безбедноста и европската перспектива на Западен Балкан.

— реклама —

Во разговорот биле разменети мислења за иднината на европскиот проект и процесот на проширување на Европската Унија. Притоа, било нагласено дека кредибилноста на проширувањето треба да се темели на јасни правила, еднакви критериуми и заслуги, а европската перспектива да остане реална и достижна за земјите кандидатки.

— реклама —

Македонската претседателка истакнала дека проширувањето на ЕУ не е само политичко и економско прашање, туку и безбедносно, особено во услови на актуелните геополитички тензии кои претставуваат закана за мирот во Европа.

Двајцата претседатели разговарале и за можностите за продлабочување на соработката во повеќе области, меѓу кои економијата, енергетиката, климатските политики, образованието и културата.

— реклама —

На средбата била изразена подготвеност за интензивирање на политичкиот дијалог на највисоко ниво, а како конкретен чекор во таа насока било договорено да се реализира официјална средба меѓу Сиљановска-Давкова и Ван дер Белен.