Во фабрика за воена и воздухопловна опрема во Јужна Кореја денеска се случи силна експлозија во која загинаа четири лица, а уште две се повредени, соопштија локалните власти.
Несреќата се случила во фабриката на компанијата Hanwha Aerospace во градот Теџон, околу 10:59 часот по локално време.
По експлозијата, над фабричкиот комплекс се издигнал густ облак чад, а на местото веднаш биле испратени противпожарни и спасувачки екипи. Според првичните информации, експлозијата се случила на првиот кат од објектот.
Јужнокорејскиот премиер Ким Мин Сеок наредил целосна мобилизација на расположливата опрема и персонал за спасувачките операции, поради стравувањата дека може да има и дополнителни жртви.
Во акцијата се вклучени пожарникари, полиција, локалните власти, како и повеќе државни институции задолжени за безбедност и вонредни состојби.
По гаснењето на пожарот, надлежните служби ќе започнат истрага за утврдување на причините за експлозијата.
