Силно невреме проследено со град во саботата попладне зафати поголем дел од Словенија, при што најпогодени беа централните, северните и југозападните делови од земјата. Словенечките метеоролози предупредуваат дека опасноста од град и натаму е присутна во поголем дел од државата.
Невремето најпрво ги погоди источните региони, а потоа се прошири и кон останатите делови на земјата. Во поширокото подрачје на Драмље бил пријавен град со големина на орев, кој предизвикал проблеми на терен.
Поради страв од град, дел од возачите во близина на Цеље ги запирале своите возила под надвозници, па дури и во тунели, што довело до сериозни проблеми во сообраќајот.
Од спасувачката служба „Reševalni pas“ предупредија дека таквото однесување е опасно и забрането. Според неофицијални информации, во еден тунел дошло и до сообраќајна несреќа поради возила кои стоеле на коловозот.
„Таквото однесување е неразумно, опасно и забрането, особено затоа што возачите кај Драмље имале можност да се исклучат од автопатот само неколку секунди пред надвозникот“, соопштија од службата.
Словенечкиот сообраќајно-информативен центар апелираше возачите да ја приспособат брзината на движење на условите на патот и потсети дека запирањето под надвозници и во тунели е забрането.
Подоцна во текот на вечерта град бил регистриран и во Корушка.
Словенечката агенција за животна средина (ARSO) издаде највисоко предупредување за можност од град за подрачјата Бовец, Горењска, Горишка, Нотрањска, Савињска, Љубљана со околината и Долно Посавје.
За останатиот дел од земјата е во сила жолто предупредување поради грмежи, поројни дождови, силен ветер и можни удари од гром, а метеоролозите предупредуваат дека локални невремиња може да има и во текот на ноќта.
