Синдикатите предупредуваат: „Фолксваген“ би можел да укине до 140.000 работни места

Синдикатите во „Фолксваген“ предупредуваат дека бројот на укинати работни места во германскиот автомобилски гигант би можел да достигне до 140.000, вклучително и работните места чие намалување веќе е договорено. Во исто време, се продлабочува несогласувањето меѓу раководството и претставниците на вработените околу плановите за преструктурирање на компанијата.

— реклама —

Шефицата на работничкиот совет на „Фолксваген“, Даниела Кавалјо, изјавила дека е нарушена довербата во раководството и во извршниот директор, Оливер Блуме. Кристијана Бенер од синдикатот „ИГ Метал“, пак, оценила дека плановите на Блуме за намалување на трошоците и зголемување на профитот се нереални.

— реклама —

Блуме пред вработените во главната фабрика на „Фолксваген“ во Волфсбург соопштил дека приближно половина од дополнителното намалување на бројот на работни места ќе мора да се спроведе во Германија. Тој посочил дека мерките се неопходни бидејќи фиксните трошоци на компанијата се околу 30 отсто повисоки во споредба со конкурентите.

Извршниот директор истовремено предупредил дека бројката од 50.000 дополнителни отпуштања на глобално ниво, која често се споменува во јавноста, не мора да биде конечна.

— реклама —

„Фолксваген“ веќе го намалува бројот на вработени во Германија, додека автомобилската индустрија во земјата се соочува со низа проблеми – намалена побарувачка, високи трошоци за енергија и сè посилна конкуренција од кинеските производители.

Компанијата проценува дека треба да ги намали трошоците за најмалку 10 милијарди евра. Дополнително, планирано е и намалување на производствените капацитети во Европа за околу 500.000 возила годишно.