Синот на Трамп инвестира во воени роботи: Израел преговара за набавка на 1.000 хуманоидни машини

Американската компанија „Фаундејшн фјучр индустрис“, во која инвеститор и главен стратешки советник е Ерик Трамп, синот на американскиот претседател Доналд Трамп, преговара со израелската војска за испорака на најмногу 1.000 хуманоидни роботи што би можеле да се користат во тунелите под Појасот Газа, објави „Фајненшл тајмс“.

Станува збор за роботите „Фантом МК1“, наменети за индустриска и воена употреба. Според претседателот и коосновач на компанијата, Мајк Лебланк, разговорите со израелски воени претставници започнале во септември, кога тој посетил тунели во Газа заедно со еден од роботите. Договор сè уште не е потпишан, а израелското Министерство за одбрана одбило да ги коментира наводите.

— реклама —

Роботите би можеле да се користат за проверка на подземните премини, откривање жици поврзани со експлозивни направи и неутрализирање стапици што претставуваат опасност за војниците. Компанијата, сепак, има и поамбициозни планови, вклучително и нивна можна употреба во директни борбени операции.

— реклама —

„Фаундејшн“ претходно соопшти дека ги тестирала роботите и со украинските сили. Во компанијата истражуваат и можности за развој на вооружени роботи, но експертите за роботика предупредуваат дека целосно автономните хуманоидни војници сè уште се далеку од сигурна примена во сложени борбени услови.

Особено внимание предизвикува деловната поврзаност на компанијата со Ерик Трамп, кој во почетокот на 2026 година станал инвеститор, а во март ја презел функцијата главен стратешки советник. Според изјавите на Лебланк за „Фајненшл тајмс“, компанијата и една фирма што ја презела добиле повеќе од 70 милиони долари преку договори со американската војска и средства за развој и тестирање на технологијата.

— реклама —

Овие деловни врски отворија прашања за можен судир на интереси. Демократската сенаторка Елизабет Ворен јавно ја критикувала доделбата на воени договори на компании поврзани со членови на семејството на претседателот. Лебланк ги отфрла тврдењата дека Ерик Трамп помогнал во обезбедувањето државни договори, а неговиот портпарол наведува дека тој не учествува во секојдневното управување, преговорите со државните институции или склучувањето договори.

— реклама —

Компанијата е основана во 2024 година и, покрај воената примена, развива роботи за индустријата и логистиката. Според изјави на нејзиниот директор Санкет Патак за „Ројтерс“, роботите наменети за одбранбениот сектор чинат околу 300.000 долари по примерок, додека индустриските модели се нудат со годишен закуп од околу 100.000 долари.

Компанијата најавила и соработка со производителот на чипови АМД за развој на новата генерација роботи „Фантом МК2“. Вредноста на потенцијалниот договор со Израел засега не е позната.