Сите капацитети ставени во функција: Мицкоски тврди дека се подготвени за пожари

Премиерот Христијан Мицкоски изјави дека државата годинава е значително поподготвена за справување со евентуалните пожари, нагласувајќи дека се преземени низа превентивни и оперативни мерки пред почетокот на летната сезона.

Одговарајќи на новинарско прашање дали државата е поподготвена во однос на минатата година, Мицкоски кусо одговори: „Да, одговорот е да“.

— реклама —

Тој информираше дека сите три противпожарни воздухоплови се сервисирани навреме и дека до вчера се наоѓале во Загреб, од каде што се очекува нивно враќање во земјава веднаш штом временските услови ќе го дозволат тоа.

— реклама —

„Направено е комплетно сервисирање и на сите оние воени возила што ги пренаменивме за борба против огнените стихии“, рече премиерот.

Мицкоски посочи дека Владата донела и заклучок за забрана за движење во шумите од 1 јули, додека преку ЗЕЛС до општините биле испратени инструкции за проверка на депониите и другите потенцијално ризични локации.

— реклама —

„Доколку не ги исполнуваат условите, тие треба итно да бидат санкционирани“, истакна тој.

— реклама —

Премиерот предупреди дека дождливата пролет придонела за бујна тревна вегетација, која со порастот на температурите ќе стане дополнителен ризик за избувнување пожари.

Како пример за успешна реакција, тој го посочи вчерашниот пожар над Штип, кој, според него, благодарение на координираната акција на пожарникарите, доброволците, локалната самоуправа и градоначалникот, бил брзо ставен под контрола и целосно изгаснат.