Скандал во Инѓија: За градоначалникот граѓаните се „мајмунчиња“, расте тензијата меѓу студентите и СНС

Напната атмосфера и сериозни инциденти го одбележаа денешниот ден во Инѓија, Србија, каде што локалните власти и поддржувачите на владејачката структура влегоа во отворен судир со граѓаните и студентите.

Сѐ започна со отстранување на транспарентот „Студентите победуваат“, кој бил поставен како дел од студентската акција за поддршка и мобилизација. Според локални извори, транспарентот бил симнат од директор на јавно претпријатие, додека целиот настан го снимал градоначалникот Марко Гашиќ.

Токму тогаш ситуацијата ескалирала. Наместо смирување, следел вербален конфликт, при што градоначалникот, според сведоштва на присутните, им се обратил на граѓаните со навредливиот збор „мајмунчиња“. Оваа изјава дополнително ја разгневи толпата и ја вжешти атмосферата на терен.

Претходно, поддржувачи на Српската напредна странка поставиле штандови директно пред студентските, што граѓаните го оценија како обид за блокада и задушување на пораката „Студентите победуваат“. Наместо демократски дијалог, следуваа тензии, дофрлувања и меѓусебни обвинувања.

На терен интервенирала и полицијата, со цел да спречи поголема ескалација на ситуацијата.

Во исто време, слични активности се одвиваат и на други локации, меѓу кои и во Белград, каде што студентите делат налепници со истата порака, додека спроти нив се позиционирани штандови на политички активисти.

Граѓанските иницијативи порачуваат дека ова не е само локален инцидент, туку показател за подлабока криза на комуникација и почит меѓу институциите и граѓаните.