На 55-годишен скопјанец му е одреден осумдневен притвор поради оштетување на влезната врата на бугарската амбасада во Скопје, информираат од Основниот кривичен суд.
Притворот е изречен по предлог на обвинителството, поради опасност од бегство и можност осомничениот повторно да го стори делото.
Според обвинителството, инцидентот се случил на 11 јануари, кога мажот со камен го скршил стаклото на влезната врата на амбасадата и веднаш го напуштил местото на настанот.
Наредниот ден, полициски службеници го пронашле и привеле осомничениот на подрачјето на Центар, по што против него е поведена кривична постапка.
Истрагата продолжува.
