Скопје се подготвува за новите електрични автобуси: Полначите ќе бидат на три локации

Град Скопје започна со подготовка на инфраструктурата за новите електрични автобуси што треба да пристигнат во главниот град, а првите 30 од предвидените 100 автобуси се очекува да бидат испорачани до Нова година.

Скопскиот градоначалник Орце Ѓорѓиевски во телевизиско гостување информираше дека во моментов се работи на подготовка на трасите и локациите за поставување на полначите. Тие се предвидени во Автокоманда, кај Железничката станица и во Ѓорче Петров.

— реклама —

Во Автокоманда ќе биде потребно обезбедување поголем електроенергетски капацитет и посилно напојување за системот за полнење, а во реализацијата ќе треба да се вклучи и ЕВН.

– Ова го правиме за кога ќе стигне првиот автобус, да бидеме подготвени, за да нема никаков застој – истакна Ѓорѓиевски.

Подготовките за инфраструктурата се одвиваат паралелно со производството и роковите за испорака на автобусите, со цел тие веднаш по пристигнувањето да можат да бидат ставени во сообраќај.

— реклама —

Вкупно се набавуваат 150 електрични автобуси за градовите во Македонија каде што има организиран јавен градски превоз. Од нив, 100 се наменети за Скопје, а покрај автобусите ќе бидат набавени и 75 станици за полнење.

Според условите на набавката, испораката ќе се одвива во три фази – првите 30 автобуси во рок од шест месеци, дополнителни 60 во рок од 12 месеци и последните 60 во рок од 18 месеци.

— реклама —

Првиот тендер за набавка на 150 електрични автобуси беше поништен во мај по решение на Државната комисија за жалби по јавни набавки, по што беше распишан нов повик. На повторената постапка во јули најниска понуда доставија унгарската „Икарус електрик“ и ЕВН, во вредност од околу 3,12 милијарди денари без ДДВ.

Новите автобуси се дел од пошироките планови за унапредување на јавниот превоз во Скопје, кои го опфаќаат и БРТ-системот и градскиот воз. Ѓорѓиевски најави дека БРТ-системот ќе биде поврзан со градскиот воз кај Железничката станица, каде што ќе има пристапни места и автобуски постојки за патниците да можат да продолжат со патувањето со воз или автобус.

Во однос на инфраструктурните проекти, градоначалникот информираше и дека е завршена првата фаза од подземната сообраќајница од Кисела Вода. Останува да се завршат осветлувањето и системот за заштита од пожари. Според најавите, работите треба да завршат до крајот на наредната година, по што е предвидена реализација на кружниот тек кај „Нова Македонија“.

Ѓорѓиевски очекува сообраќајницата целосно да биде функционална до крајот на 2028 или почетокот на 2029 година.

Во кругот на клиничкиот центар „Мајка Тереза“ е распишан и тендер за изградба на две катни монтажни паркинг-гаражи. Тендерската постапка, според најавата, треба да заврши до средината на октомври, по што би започнало нивното монтирање.