Скопје1 дознава: 17-годишна девојка е втората жртва во Богданци, претходно го пријавила момчето за насилство

Седумнаесетгодишна девојка од Богданци е втората жртва пронајдена во опожарениот автомобил кај местото „Ичева чешма“, дознава неофицијално Скопје1. Покрај возилото беше пронајден мртов 21-годишниот Виктор Г., кој, според информациите до кои дојде нашата редакција, бил нејзино момче. Случајот добива дополнителна тежина по сознанијата дека девојката претходно го пријавила за физичко насилство, а на блиски пријатели им раскажувала и за закани.

Според информациите на Скопје1, малолетничката претходно пријавила дека била физички нападната во домот на момчето. Полицијата постапила по пријавата, го привела 21-годишникот и го известила надлежното обвинителство. Овој настан е потврден и во известување од Министерството за внатрешни работи доставено до Скопје1.

— реклама —

„Полициски службеници лишија од слобода 21-годишен жител на Богданци. Според пријавеното, тој на 30.09.2026 околу 21:00 часот во неговиот дом физички ја нападнал неговата 17-годишна девојка. За настанот е известен јавен обвинител од Основното јавно обвинителство Гевгелија, а по документирање на случајот ќе биде поднесена соодветна пријава“, стои во известувањето на МВР.

Според дополнителните сознанија на Скопје1, девојката зборувала со луѓето од своето опкружување за нападите и заканите кои ги трпела.

— реклама —

Во пораки до кои дојде редакцијата, малолетничката им раскажувала на пријателите дека добивала закани од момчето. Според нејзините тврдења пренесени во комуникацијата, тој во една пригода се обидел да ја нападне со нож, по што таа успеала да избега низ прозорец.

Овие наводи засега не се независно потврдени од истражните органи за тоа дали токму вака се пријавени.

Двете безживотни тела беа пронајдени на 3 ноември, откако во 18:40 часот жител на Богданци пријавил опожарен паркиран автомобил и лице кое не давало знаци на живот во негова близина.

— реклама —

Полициските службеници на местото го пронашле 21-годишниот Виктор Г., чија смрт ја констатирала екипа на Итната медицинска помош. По локализирањето на пожарот, во автомобилот било откриено уште едно опожарено тело.

По наредба на јавен обвинител од Основното јавно обвинителство Гевгелија, телата се предадени на обдукција за утврдување на идентитетот и причините за смртта.

— реклама —

Иако изворите на Скопје1 посочуваат дека второто лице е 17-годишната девојка, официјалната идентификација и понатаму треба да биде потврдена од надлежните институции.

Засега не е утврдено како настанал пожарот, што ја предизвикало смртта на двете лица и дали претходно пријавеното насилство има поврзаност со нивната смрт.